Алюетов – Чесноковтың «Астанаға» ауыспағаны жайлы: ол тек шетелге кетуді көздеп отыр

Қазіргі «Ертіс» клубының бас бапкері Ринат Алюетов BorodAbata.kz сайтына берген сұхбатында өткен жылы Ислам Чесноковтың неліктен «Астанаға» ауыспағаны жайлы айтып берді.

– Өткен жылы Ислам «Астанаға» ауысуы мүмкін деген ақпарат шықты. Бірақ трансфер жүзеге аспады. Сіздің ойыңызша, бұл дұрыс шешім болды ма әлде «Астанаға» ауысуы керек па еді? Олар жыл сайын чемпиондыққа таласып, Конференция лигасының топтық кезеңінде ойнайды.

– Эльхан Астановты қараңыздаршы. «Ордабасыда» қалай ойнайтын еді. Ал қазір «Астанада» көп ойнап жүрген жоқ. Исламның да негізгі құрамда ойнауына ешкім кепілдік бере алмайды. Ол қазір «Тобылдың» негізгі ойыншысы. «Астананың» жейдесінде ойнау оңай емес. Үлкен қысым болады.

– «Астана» оған шынымен де қызығушылық танытты ма әлде қосалқы құрамын нығайту үшін алмақшы болды ма?

– «Астана» еліміздегі футбол бренді ғой. Чемпиондар лигасы, Еуропа лигасы, Конференция лигасының топтық кезеңінде ойнады. Сондықтан олар Қазақстандағы ең мықты, талантты футболшыларды жинайды. Оларға екі мықты құрам керек. Сондықтан осындай футболшыларды іздейді. Олар Самородовты да шақыруы мүмкін еді. Себебі қазір «Астанада» Быстров, Вороговский секілді қазақстандық футболшылар ойнап жатыр. Исламмен де байланысқа шыққан шығар. Бірақ Чесноков шетелге кетуді көздеп отыр.

Ислам Чесноков жақын күндері «Хартсқа» ауысуы мүмкін. Бұл туралы шотландиялық клубтың қожайыны Марк Дональдсон да хабарлады.