Муханов – ҚПЛ-ға оралу туралы: бостан бос уақыт өткізгім келмейді

«Ақтөбенің» бұрынғы бас бапкері Владимир Муханов ASnews.kz сайтына берген сұхбатында Қазақстандағы бапкерлік қызметке қайта оралу жоспары бар-жоғын айтып берді.

«Әзірге ешқайда асықпаймын. Мәскеуде шаруа жетерлік, немерелеріме қарайласып жүрмін. Иә, бас тартуға болмайтын қоңырау шалынып, футболға қайта оралған кездерім болды. Қазір істен кеттім деп айта алмаймын – футболдан толығымен кету мүмкін емес қой, – бірақ жұмыс істеуге деген ерекше жалын жоқ.

Жыл сайын Анталиядағы оқу-жаттығу жиындарына келемін, өйткені мұнда достарым да, шәкірттерім де көп. Бәрін бірден қайдан және қашан көре аласың? Тек оқу-жаттығу жиындарында. Футболдың ауасымен тыныс алып, өткенді еске алып, әңгімелесу үшін келемін. Бұл маған қажет, бұл – жан қалауымен жасалатын сапарлар.

2017 жылы да ештеңе жоспарламаған едім: қоңырау шалып, команданың лигадан ұшып кеткелі жатқанын, көмек керегін айтты. 2021 жылы «Ақтөбеге» оралғанда да олар төменгі лигаға түсіп қалудың алдында тұрған. Енді кіммен сөйлесетінімді, қызығушылықтың қаншалықты терең – үстірт немесе шынайы екенін ойланатын боламын. Қазір Мәскеу түбіндегі Раменскоеде тұрамын. Жергілікті команда да мені шақырды, бірақ мен бас тарттым. Клубтың болашағы бұлыңғыр, ал мен халтурамен айналысқым келмейді. Жай келіп, уақыт өткізу – маған жат дүние. Қазақстанға оралуға келсек, ол жақтан ешкім хабарласқан жоқ. Ресейде нұсқалар болды, бірақ бірінші лига деңгейіндегі командалардан», – деді Муханов.

Владимир Муханов – «Ақтөбе» тарихындағы ең көп титул жеңіп алған бапкер. Ресейлік маманның жетекшілігімен «ақ-қызылдар» Қазақстан чемпионатында үш рет топ жарған, сондай-ақ ел Кубогы мен Суперкубогын иеленген.

Бұған дейін белгілі германиялық маман Феликс Магат «Ақтөбенің» бас бапкері атануы мүмкін екені белгілі болған еді.