Струмия «Ақтөбеге» оралуы мүмкін. Клуб жазда футболшымен байланысқа шыққан

«Ақтөбе» Леонель Струмияны осы жазда қайтару мүмкіндігін қарастырды, деп хабарлайды BorodAbata.kz. Аргентиналық футболшы кипрлік АЭЛ-ден кетіп, жақын арада «Будучьностқа» (Черногория) ауысады.

Еурокубок алдында құрамын күшейтіп жатқан «Ақтөбе» 32 жастағы жартылай қорғаушымен байланысқа шыққан. Келіссөз процессінің тоқтауына футболшының қазіргі формасы себеп болды. Струмия соңғы рет алаңға сәуір айында шыққан екен.

Нәтижесінде аргентиналық ойыншы Чемпиондар лигасының іріктеу кезеңінде өнер көрсететін черногориялық «Будучностьтың» ұсынысын қабылдады. Бірақ жартылай қорғаушы әлі де болса, Қазақстанға оралуға дайын:

«Ақтөбелік жанкүйерлер маған әлі күнге дейін хат жазып тұрады. Әрине, мен бұл байланысты сезініп отырмын және қайта оралсам, қуанышты болар едім», - деді Струмия.

Подгорица клубымен жасасқан келісімшартқа сәйкес, Леонель басқа клубтан ұсыныс түссе, сол сәтте кетуі мүмкін.

Еске салайық, Вилья-Нуеваның тумасы ҚПЛ клубына 2023 жылдың ақпанында қосылып, онда екі жыл ойнады. 58 матчта Струмия бір нәтижелі пас берді, сонымен қатар команда капитаны атанды.