«ҚПЛ-да баяғыдай ақша жоқ»: «Тобылдың» экс-футболшысы – Мозес, «Ақтөбе» және жұмысы жайлы

2010-шы жылдары Ненад Шливич «Тобылдың» көшбасшысы әрі негізгі қорғаушысы болды. Ол РПЛ-да өнер көрсетіп, мол тәжірибе жинады. Бүгінде 40 жастағы сербиялық маман футболшылардың мүддесін қорғайтын агент ретінде жұмыс істейді, соның ішінде ҚПЛ ойыншылары да бар.

ASnews.kz сайтына берген сұхбатында «Ростовтың» бұрынғы ойыншысы:

• «Ақтөбеге» жаңа жұлдызды футболшыны алуға қалай көмектескенін айтты;
• қостанайлықтардың алдағы маусымдағы мүмкіндігін бағалады;
• және жергілікті трансфер нарығының қыр-сырымен бөлісті.

– Ненад, сіз Иван Ордецтің «Ақтөбеге» ауысуына тікелей қатысқан екенсіз. Келіссөздер қиын болды ма?

– Келіссөз процесі шынымен де оңай болған жоқ, бірақ біз «Ақтөбе» басшылығымен ортақ шешімге келіп, мәселені реттедік. Әсіресе спорт директоры Марат Хайруллинге алғыс айтқым келеді – ол кәсіби деңгейде жұмыс істеді.

– Луиш Нани мен Виктор Мозес секілді трансферлер ҚПЛ-дың танымалдылығын арттыра ала ма? «Ақтөбе» мен «Қайсардың» шығындары өз-өзін ақтай ма?

– Әрине, бұл – топ-деңгейдегі футболшылар. Нани мен Мозестің қазіргі физикалық жағдайын бағалау қиын, бірақ олардың Қазақстан футболының дамуына үлес қосқан-қоспағанын уақыт көрсетеді.

– Шетелдік ойыншыларды қазақстандық клубтармен келіссөз кезінде не нәрсе кері итермелейді?

– Көп легионерлер инфрақұрылымға және отбасымен бірге тұратын қаланың қандай екеніне қарайды. Мен өзім Қазақстанда ұзақ жыл ойнадым, көптеген дүниелерді білемін, сондықтан оларға: бұл ел өмір сүруге жайлы деп айтамын.

– «Қайраттың» Чемпиондар лигасындағы ойыны қазақстандық футболға қалай әсер етуі мүмкін?

– Менің ойымша, бұл көптеген балаларды ынталандырды, енді олар футбол секциясын таңдайды. Біздің ойыншымыз Еркін Тапалов үлкен клубтарда тәжірибесі болмаса да, арманына қарай ұмтылып, қаржылай тұрғыда тиімді ұсыныстардан бас тартты.

Нәтижесінде Еркін миллиондаған адам қиялдайтын деңгейде ойнады. Соған қарай ұмтылу керек.

– 2010-жылдардың ортасымен салыстырғанда жалақы деңгейі қаншалықты өзгерді?

– Дағдарысқа байланысты жалақы төмендеді. Осындай жағдайда директорлар, функционерлер мен инвесторлар қаржыны есептей бастады, бұл – заңды нәрсе. Қазір ең бастысы – баға мен сапаның арақатынасы.

– Ойыншы кезіңізде сіз Нұрбол Жұмасқалиевпен бірге шамамен 80 матч өткіздіңіз. Оны маман ретінде қалай бағалайсыз және мінезі туралы не айтар едіңіз?

– Нұрбол – мен ойнаған футболшылардың ішіндегі ең үздіктерінің бірі, тіпті ең үздігі деуге болады. Бапкер ретінде де ол нәтиже көрсете алатынын дәлелдеді. Біз үнемі хабарласып тұрамыз, мен оған табыс тілеймін.

– Соңғы жылдары «Тобылға» чемпиондық үшін не жетіспей жатыр?

– Бұл – қиын сұрақ. Меніңше, «Тобылға» тұрақтылық жетіспейді: селекциясы сапалы, бірақ ең жоғары мақсаттарға жету үшін барлық ұсақ-түйекке дейін тұрақтандыру қажет.

– Қазір сіз шетелдік футболшыларды Премьер-лига клубтарына әкелумен айналысып жүрсіз бе?

– Әрине. Мен әркімнің өз міндеті бар команда құрамындамын. Әрқайсымыз өз жұмысымызды атқарамыз.

– Чемпионатты 16 клубқа дейін кеңейту – пайдалы ма, әлде зиян ба?

– Бұл тек пайда әкеледі. Бәсеке күшейеді, ал бәсеке әсіресе жас ойыншылардың дамуына әсер етеді. Чемпионаттың кеңеюі отандық футболдың игілігіне жұмыс істейді.