Жуков – ТОП-5 чемпионатта ойнай алмағаны туралы: қолымнан келер еді

Жақында ғана «Ақтөбе» клубына ауысқан Қазақстан құрамасының жартылай қорғаушысы Георгий Жуков BorodAbata.kz сайтына берген сұхбатында неліктен ТОП-5 чемпионатта ойнай алмағанын түсіндірді.

– Жас кезіңде Лукаку, Менье, Янузай, Де Брюйне, Троссардпен бірге доп тептің. Солар секілді ТОП-5 чемпионатта ойнап кетуіңе не жетіспеді?

– Бұл туралы бұған дейін де ойланғанмын. Кезінде олардан да мықты футболшылар бар еді. Қазір сол жігіттердің мансабы менікінен де нашар. Мен бұл үшін өкінбеймін. Әрине, қолымнан келер еді. Жас кезімде дұрыс шешім қабылдап, жауапкершілігім мол болғанда, Лукакулар секілді жоғары деңгейде ойнайтын едім. Еш өкініш жоқ. Мүмкін алдымда бұдан да жақсы сәттер болатын шығар. Кез-келген адам өз мүмкіндігін біледі. Нені жасай алады, не қолынан келмейді дегендей. Демек, менің өмірім осылай өрбуі тиіс болған. Әлі ештеңе аяқталған жоқ. Әр күн сайын өзімді жақсартқым келеді. Қалай болатынын уақыт көрсете жатар.

– Сен футбол мектебін Бельгияда өткендіктен, сол елдің ұлттық құрамасында ойнауды армандадың. Себебі ол жақта әлем чемпионатында ойнайтын, тіпті, жүлдеге таласатын мүмкіндік бар.

– Иә, кез-келген футболшы әлем чемпионатында ойнағысы келеді. Жас кезімде мен де соны армандадым және бұл арманға Бельгия құрамасымен жету оңайырақ болды. Ештеңе етпейді. Себебі мен Бельгия құрамасындағы ойыншылармен бәсекелесе алмаймын. Бірақ Қазақстан құрамасы да алдағы уақытта Еуропа және әлем чемпионатына шығуға таласа алады.