Шпилевский – «Тобылды» жеңгені жайлы: «Париға» оңай болмады – қарсыласымыз осал емес

Ресейлік «Пари НН» клубының бас бапкері Алексей Шпилевский ASnews.kz сайтына берген сұхбатында «Тобылға» қарсы өткен жолдастық матчты (2:1) қорытындылады.

«Пари» командасының ойынына көңілім толды. Бұл өте жақсы матч болды – Қазақстан Кубогын жеңіп алған, мінезді командаға қарсы ойнадық. «Тобылдың» құрамы қаншалықты толық жасақталғанын білмеймін, бірақ бізге оңай болған жоқ. Көңілімді қалдырған жалғыз жайт – өз мүмкіндіктеріміздің бәрін пайдалана алмадық.

Ойын соңында болмашы жерден бір гол жіберіп алғанымыз ашуымды туғызды, ал жалпы алғанда матч қызықты өтті. Устименко мен Үсеновті көргеніме қуандым, себебі оларды бұрын өзім жаттықтырғанмын. Сондай-ақ олардың бапкерімен де жақсы әңгіме болды, сондықтан «Тобылға» сәттілік тілеймін, – деді маман.

Александр Зуевтің голы Қостанай командасын Белекте (Түркия) өткен жолдастық кездесуде жеңілістен құтқара алмады. Осылайша, Нұрбол Жұмасқалиев шәкірттері оқу-жаттығу жиыны аясындағы төрт матчта небәрі екі гол соқты.

Шпилевский 2018-2021 жылдар аралығында «Қайратты» жаттықтырды. 2020 жылғы маусымда алматылық клуб ел чемпионы атанды. Қазіргі таңда оның «Пари НН» командасы Ресей Премьер-лигасының турнирлік кестесінде 14-орында тұр.