«Қайсардың» жаңа ойыншысының бұрынғы бапкері: ол – нағыз сүмелек

Махачкалалық «Легионның» бұрынғы бапкері Ахмад Магомедкамилов ASnews.kz сайтына берген сұхбатында «Қайсардың» жаңа ойыншысы Амир Мохаммадтың қасиеттері туралы тым өткір пікір білдірді.

«Егер бұл ақпарат сізге қажет болса айтайын, Амир – нағыз сүмелек. Ал ойын қабілетіне келер болсақ, жағдай әлдеқайда жақсы», – деді Черкесскінің «Нарт» клубының қазіргі жаттықтырушысы.

Еске салайық, қызылордалықтар 29 жастағы сол қаптал қорғаушысымен келісімшартқа отырғанын жариялаған болатын. Ресейлік футболшы соңғы екі жылын «Балтикада» өткізіп, онда 39 ойында үш гол соқты және үш нәтижелі пас берді.

Мохаммад 2019 жылы мансабын уақытша тоқтатқанға дейін Магомедкамиловтың қол астында өнер көрсеткен. Бірнеше айдан кейін қорғаушы «Красный» футбол клубының ойыншысы ретінде алаңға қайта оралды.