Беларусь сарапшысы – Громыконың «Қайраттан» кетуі жайлы: Еуропаға бармай, ақшаны таңдады

Беларусьтік сарапшы, «Ухо» телеграм-арнасының авторы Сергей Волков ASnews.kz сайтына берген сұхбатында «Қайраттың» бұрынғы жартылай қорғаушысы Валерий Громыконың «МЛ Витебскке» ауысуына қатысты пікір білдірді.

«Громыконың Беларуське қайта оралғаны мен үшін үлкен тосынсый болды. Өйткені, менің білуімше, оның Еуропа және Азия чемпионаттарынан нақты ұсыныстары болған. «МЛ Витебскке» ауысуы – тек қаржылық себептерге байланысты қабылданған шешім.

«Эмирейтс» стадионында нәтижелі пас беріп, араға екі апта салып Беларусь клубымен келісімшартқа қол қою – әрине, артқа жасалған қадам. Бірақ Валерий өзіне таныс ортаға оралды, онда ол тұрақты ойын тәжірибесінен қағылмайды. Сондықтан ұлттық құрамадағы ойынына бұл ауысым айтарлықтай әсер етпейді», – деді Волков.

29 жастағы жартылай қорғаушы «Қайрат» сапына 2024 жылдың шілде айында қосылған еді. Ол алматылық клубта 57 матч өткізіп, 7 гол соқты, 15 нәтижелі пас берді. Сондай-ақ 2025 жылы Беларусьтің үздік футболшысы атанды.

Бұған дейін Громыко Қызылорданың «Қайсар» және Мәскеудің «Торпедо» клубтарында өнер көрсеткен.