Қазақстанның бес дүркін чемпионы Каньястан кейін мансабын аяқтағанын хабарлады

«Астана» мен Конго ДР құрамасының бұрынғы шабуылшысы Жуниор Кабананга ASnews.kz сайтына берген сұхбатында кәсіби мансабын аяқтағанын растады.

«Қазір мен футбол ойнамаймын, тек жас ойыншыларға жеке жаттығулар өткізіп жүрмін. Қазақстан Премьер-лигасын бақылаймын ба? Әрине, маған жақсы таныс чемпионат туралы жаңалықтарды әлі күнге дейін оқып тұрамын», – деді 36 жастағы африкалық футболшы.

Кабананга Премьер-лигада 67 матчта 25 гол соғып, 10 нәтижелі пас берген. Ал еурокубоктарда тоғыз рет көзге түсті, оның ішінде «Олимпиакос» пен «Вильярреал» қақпасына гол соқты.

Конголық шабуылшы – Қазақстанның бес дүркін чемпионы және Кубок иегері. «Астанадан» бөлек ол бельгиялық «Андерлехт», түркиялық «Қарабюкспор», сауд арабиялық «Әл-Наср» және «Мақтаарал» клубтарында өнер көрсеткен.

Бұған дейін елордалық клубтың тағы бір бұрынғы легионері Роджер Каньяс та ойыншы ретіндегі мансабын аяқтағанын мәлімдеген болатын.