«Ақтөбенің» легионері – Нанидің ауысуы жайлы: мұны хайп және оны мазақ ету деп ойладым

«Ақтөбенің» украиналық қорғаушысы Иван Ордец ASnews.kz сайтына берген сұхбатында португалиялық ойыншы Луиш Нанидің ауысуына қатысты пікір білдірді.

«Нанидің ауысатынын алғаш естігенде, мен мұны жай ғана хайп және футболшыны мазақ ету деп ойладым. Басында тіпті Луиштің өзі бұл туралы білмейтін шығар деп топшыладым. Кейін – бір жаңалық, екінші, үшіншісі шықты...

Әдемі сөздер айтпай-ақ қояйын, бірақ екі күн бұрын оның медиалигадағы ойыны түсірілген бейнекескінге тап болдым. Оның қандай бапта екендігін көрдім. Әдетте мансабын аяқтағаннан кейін көпшілігі спортты тастап, артық салмақ қосып кетеді. Бірақ Луиштің нағыз кәсіпқой екені көрініп тұр. Иә, бәлкім ол өзінің ең үздік бабында емес шығар, бірақ ол өзін күтеді. Егер ниеті болса, ол көмектесе алады», – деді Ордец.

Сонымен қатар, украиналық футболшы команда ішіндегілердің бұл дүркіреген трансферді қалай қабылдағанын айтып берді.

«Иә, бұл трансфер – «вау». Командадағы жігіттер де солай қабылдады. Түскі, кешкі аста отырып талқылаймыз – барлығы жағасын ұстап: «ол бұл жақта не жоғалтты?» – дейді. Нани мен Қазақстанның қандай байланысы бар?», – деді қорғаушы.

Луиш Нани – 39 жастағы португалиялық вингер, ол «Манчестер Юнайтед» сапындағы ойындарымен кеңінен танымал. Ол аталмыш клубпен АПЛ-ды төрт рет және Чемпиондар лигасын жеңіп алған. Сондай-ақ ол Португалия құрамасымен Еуро-2016 чемпионы атанды.

Бұған дейін Ордец Қазақстан чемпионатының даму деңгейін бағалап, алдағы маусымнан не күтетінімен бөлісті.