Африкалық сарапшы – «Тобылдың» жаңа ойыншысы жайлы: Сиссе Гвинея құрамасында ойнауға лайық

Гвинеялық сарапшы және X желісіндегі Scout224 парақшасының авторы Мусса Траоре ASnews.kz сайтына берген сұхбатында «Тобылдың» жаңа ойыншысы Абдулай Сиссенің қабілеті туралы айтып берді.

«Абдулай – «Тобыл» үшін тамаша жаңа ойыншы. Ол өте әмбебап футболшы, ал оның ұлттық құрамаға шақырту алмай жүрген себебі – алаң ортасындағы бәсекелестіктің өте жоғары болуында», – деп түсіндірді сарапшы.

Еске салайық, «Тобыл» 29 жастағы африкалық жартылай қорғаушыны сербиялық «Нови-Пазардан» 70 мың еуроға сатып алған болатын. Ал оның нарықтық құны 700 мың еуроны құрайды – бұл қазіргі таңда қостанайлықтардың ең қымбат екінші футболшысы.

Сиссенің еншісінде Гвинея құрамасы сапында өткізген 18 ойыны және бір голы бар. Ол ұлттық құрамада небәрі 17 жасында дебют жасаған. Оның позициясында Наби Кейта («Ференцварош»), Абдулай Туре («Гавр») және Сейдуба Сиссе («Леганес») өнер көрсетеді.