Жоао Пауло – Қазақстандағы болашағы жайлы: «Ордабасыдан» қызығушылық бар

«Ордабасы» мен «Қайраттың» бұрынғы шабуылшысы Жоао Пауло ASnews.kz сайтына берген сұхбатында Қазақстанға оралуы мүмкін екенін айтты.

«Маған әлі де қазақстандық клубтар хабарласып тұрады. «Ордабасы» менің физикалық жағдайымды сұрастыруда – олар үшін менің алаңға қашан орала алатынымды білу маңызды. Шынымды айтсам, 100% қалпыма келу үшін маған әлі 40 күн қажет.

Сондай-ақ Бразилия командаларымен де байланыс бар, сондықтан айдың соңына дейін мансабымды қайда жалғастыратынымды шешуім керек», – деді форвард.

Еске салайық, өткен жылдың көктемінде Пауло тізесінің крест тәріздес байламдарын жарақаттап алған болатын. Содан бері бразилиялық футболшы алаңға шыққан жоқ. Жазда ол 38 жасқа толады.

Шабуылшының еншісінде Премьер-лигадағы 150 матчта соғылған 75 гол мен 30 нәтижелі пас бар. Бұған дейін ол болгариялық «Ботев» пен «Лудогорец» сапында өнер көрсеткен.

«Қайрат» сапында Пауло екі мәрте Қазақстан чемпионатының алтын жүлдесін иеленді, сондай-ақ ел Кубогы мен Суперкубогын жеңіп алды.