Нагучев – Ройстың «Ақтөбеге» ауысуы жайлы: бұл трансферге сенбеймін – ол Қазақстанға келмейді

Ресейлік «Матч ТВ» арнасының белгілі комментаторы Роман Нагучев ASnews.kz сайтына берген сұхбатында Марко Ройстың «Ақтөбеге» ауысуы мүмкін деген ақпаратқа қатысты пікір білдірді.

«Менің ойым қарапайым: Ройс «Ақтөбеге» өтпейді. Кез келген нәрсені күтуге болады, бірақ шындық осындай.

Қателескеніме қуанар едім, алайда Марконы және оның мансабының қалай өрбігенін білетіндіктен айтарым – ол Қазақстанға келмейді», – деді комментатор.

БАҚ мәліметінше, Луиш Нанимен келісімшарт жасасқаннан кейін «ақ-қызылдар» тағы бір жұлдызды футболшы Марко Ройсты шақыруды жоспарлап отыр. 36 жастағы жартылай қорғаушы қазір америкалық «Лос-Анджелес Гэлакси» сапында өнер көрсетеді.

Еске салайық, Нагучевтің эфирде айтқан «Марко Ройс, менің сүйікті Марко Ройсым» («Марко Ройс, мой любимый Марко Ройс») деген сөзі желіде вирустық мемге айналған болатын. Бұл тіркес 12 жыл бойы «Боруссия» сапында сол күйі чемпион атана алмаған неміс футболшысының трагедиялық тағдырына деген аяушылықтың символы іспетті қабылданған.