«Тобылдың» экс-футболшысы – клубтан кетуі жайлы: әлі күнге дейін жалақымды күтіп жүрмін

«Тобылдың» экс-шабуылшысы Энрике Девенс ASnews.kz сайтына берген сұхбатында қостанайлық клубтан не себепті кеткенін айтып берді.

«Мен әбден қажыдым»

«2025 жыл мен үшін кәсіби тұрғыда да, жеке өмірімде де, рухани жағынан да біртүрлі болды. Жылды Катарда бастадым, кейін «Жальгириске» ауыстым, соңында «Тобылдан» бір-ақ шықтым. Мұндай ауыс-түйіс кез келген футболшыға оңайға соқпайды. Бейімделу жағынан қиындық болған жоқ, бірақ тұрақтылық жетіспеді.

Маған мүмкіндік бергені және жағымды таныстықтар сыйлағаны үшін «Тобылға» алғысым шексіз. Командада да, жанкүйерлер арасында да мені өте жақсы қарсы алды. Қазақстан Кубогындағы жеңіс – керемет сәт болды», – деп бастады бразилиялық футболшы.

Қарызға қарамастан, тыныш кеттім

«Алайда клуб әлі күнге дейін жалақы бойынша берешегін өтеген жоқ. Кету туралы шешім екі жақтың келісімімен қабылданды. Бас бапкер Нұрбол Жұмасқалиевпен және клуб басшылығымен жақсы әңгімелестік. «Нұрбиға» деген құрметім ерекше.

Маған ұнамаған жайттар болды, бірақ оларды жария түрде айтқым келмейді. Өзімді тиісті жерде жүргендей сезінбедім. Бұл жеке өмірімдегі қиын жыл. Маған серпіліс қажет болды. Мұнда «Тобылға» пайдамды тигізе алмайтынымды түсіндім».

«Қазақстанға келгеніме қуаныштымын»

«Ертең қайда болатыныңды ешқашан білмейсің. Мүмкін, түптің-түбінде ҚПЛ-да қалып қоятын шығармын. Қостанайда өз мүмкіндігімді толық ашу үшін ойын практикасы жетіспеді.

Мені дұрыс түсініңіздер: Қазақстан – керемет ел. Жергілікті халықтың мінезі бразилиялықтарға ұқсайды деп ойлаймын. Мәдениетімізде ортақ тұстар көп. Қостанай – қызықты қала, Астана – керемет, ал Алматы – тіптен керемет. Әрине, тізімді жалғастыруға болады, бірақ бұл қалалар маған қатты ұнады», – деді ойыншы.

Шілде айында «Тобыл» Девенс үшін литвалық клубқа 120 мың еуро төлеген болатын. Қостанайлықтар сапында өткізген тоғыз матчында 28 жастағы шабуылшы бір гол соғып, екі нәтижелі пас берді және Қазақстан Кубогын жеңіп алды.

Бұған дейін Люксембург азаматтығы бар бразилиялық футболшы Литваның «Бабрунгас», «Дайнава», «Трансинвест» клубтарында, Болгарияның «Крумовградында» ойнаған. Сондай-ақ Девенс Катардың «Аль-Бидда» клубында екі ай доп тепкен.