«Ақтөбе» Шакиримен келіссөз жүргізген жоқ: швейцариялық ойыншы ҚПЛ-ға келмейді

Швейцариялық 34 жастағы шабуылшы Джердан Шакири «Базель» сапында өнер көрсетуін жалғастырады, деп хабарлайды ASnews.kz.

БАҚ беттерінде тараған ақпараттарға қарамастан, «ақ-қызылдар» «Бавария» мен «Ливерпульде» ойнаған вингердің трансфері жөнінде келіссөз жүргізбеген. Футболшы қазір бар назарын тұрақты түрде капитан ретінде ойнап жүрген «Базельге» аударып отыр.

«Қазақстанда жазылып жатқанның бәрі – жалған. «Ақтөбемен» ешқандай байланыс болған жоқ», – деді Шакиридің агенті Энис Рамадани.

Жасына қарамастан, Чемпиондар лигасының екі дүркін жеңімпазы Швейцария чемпионатының ең нәтижелі футболшылары тізімінде көш бастап тұр. Соңғы үш матчта Шакири үш гол соғып, екі нәтижелі пас берді.

Бұған дейін «Ақтөбе» португалиялық шабуылшы Луиш Нанимен келісімшартқа отырғанын хабарлаған еді. Жақын арада клубқа тағы бір жұлдызды ойыншы қосылады деп күтілуде.