Әлем чемпионы – Мозес жайлы: тәжірибесі жастарға көмектеседі

ҚПЛ клубтарының экс-қорғаушысы, нигериялық Алию Абубакар ASnews.kz сайтына берген сұхбатында отандасы Виктор Мозестің қызылордалық «Қайсарға» ауысуына қатысты пікір білдірді.

«Бұл – ғажап аңыз. Мен жасөспірімдер арасындағы әлем чемпионатын (U17), ал ол 2013 жылғы Африка Ұлттар Кубогын жеңіп алған жылы онымен жеке кездесу бақытына ие болдым.

Виктор – тек Нигерияда ғана емес, бүкіл Африкада біз үшін қаһарман әрі үлгі тұтар тұлға. Оның тәжірибесі Қазақстандағы келесі буын ойыншыларына әлемдік деңгейдегі лигаларға ауысуға мотивация беретініне сенемін, өйткені жергілікті жігіттерде талант бар», – деді Абубакар.

Еске салайық, «Қайсар» Виктор Мозеспен «1+1» жүйесі бойынша келісімшартқа отырғанын ресми түрде жариялаған еді. Атақты вингердің трансферлік құны 300 мың еуроға бағаланады.

Бұған дейін Алию Абубакар қарағандылық «Шахтер», «Оқжетпес», «Жетісу» және «Хан-Тәңірі» (Бірінші лига) намысын қорғаған. Қазіргі уақытта қорғаушы Малайзия чемпионатындағы «Перак» клубында өнер көрсетеді.

Сондай-ақ бұл трансферге «Қайраттың» экс-жартылай қорғаушысы Исаэль Барбоза да реакция білдірді.