Парфёнов: «Ақтөбе» «Легияны» жеңе алады – мен бұған сенемін

«Ақтөбенің» бұрынғы бас бапкері Дмитрий Парфенов «ақ-қызылдардың» Еуропа лигасындағы «Легиямен» болатын матчтағы мүмкіндіктеріне баға берді.

«Легияның белгілі бір статусы бар, бірақ Польшадағы чемпионаттың әлі басталмағанын ақтөбеліктердің пайдасына жаратуға болады. Олар жаңа бапкерге енді ғана үйреніп жатыр, неге жеңбеске? Екі матчта бәрі де мүмкін. Сонымен қатар, өз алаңында тамаша қолдауға ие болады.

«Ақтөбе» оларды жеңе алмаса да, өздерін Конференция лигасының екінші кезеңінде көрсете алады. Бірақ мен поляктарды жеңгенді жөн көремін (күлді), өйткені «Спарта» тәжірибелі команда. Менде клуб пен жанкүйерлер туралы жағымды естеліктер қалды, сондықтан мен олар үшін алаңдаймын және сенемін», - деді Парфенов BorodAbata.kz сайтына берген сұхбатында.

«Ақтөбе» Еуропа лигасының бірінші іріктеу кезеңінде «Легиямен» кездеседі. Жеңілген жағдайда Конференция лигасының екінші кезеңінде «Спарта Прагаға» қарсы ойнауға мүмкіндік алады.