«Қайсар» тарихындағы алғашқы нигериялық футболшы: Мозес матч тағдырын жалғыз өзі шеше алады

«Қайсардың» бұрынғы шабуылшысы Филип Эдейпо ASnews.kz сайтына берген сұхбатында нигериялық футболшы Виктор Мозестің командаға келуіне қатысты пікір білдірді.

«Командада Мозестің болуы – өз алдына үлкен артықшылық. Ол өте тәжірибелі футболшы. Виктор жас ойыншыларға ақыл-кеңес беріп, тіпті матчтардың тағдырын жалғыз өзі өзгерте алатын деңгейі бар.

Сонымен қатар, Мозес әртүрлі ойыншылармен және бапкерлермен көп жыл ойнаған, сондықтан «Қайсарға» жаңа идеялар әкеле алады. Онымен бірге менің сүйікті командам бір саты жоғары деңгейге көтеріледі деп үміттенемін», – деді қызылордалық клубтың бұрынғы шабуылшысы.

«Қайсар» кезінде «Челси», «Ливерпуль» және «Интер» клубтарында ойнаған әмбебап футболшы Виктор Мозеспен келісімшартқа отырды. Ол желтоқсан айында 35 жасқа толды. Мозес «Челси» сапында Англия Премьер-лигасын, Еуропа лигасын және Англия кубогын жеңіп алған.

Филип Эдейпо «Қайсар» тарихындағы алғашқы нигериялық футболшы болып ретінде тіркелген. Ол «қасқырлар» сапына 2011 жылы қытайлық «Шэньян» клубынан ауысып келіп, 37 матчта алты гол соқты.

Бұған дейін ҚПЛ-да ойнаған нигериялық шабуылшы жерлесінің «Қайсарға» ауысуына қатысты пікір білдірген болатын.