Әзірбайжан сарапшысы – «Қайраттың» жаңа ойыншысы жайлы: жиі қателік жіберіп, алаңнан қуылды

Әзірбайжандық CBC Sport телеарнасының тілшісі Сулейман Велиев ASnews.kz сайтына берген сұхбатында «Қайраттың» жаңа ойыншысы Лукас Африкоға қатысты екіұшты пікір білдірді.

«Африко тұрақсыз ойнады, «Габалада» жүргенде жиі дөрекі қателіктер жіберіп, ескерту алуға бейім болды. Бұл – «Габаланың» сол маусымда Әзірбайжан жоғары лигасынан ұшып кетуінің бір себебі», – деді сарапшы.

Еске салайық, «Қайрат» Лукас Африкомен 2026 жылдың соңына дейін келісімшартқа отырғанын жариялады.

30 жастағы бразилиялықтың алдыңғы клубы түркиялық «Ванспор» (Түркияның екінші дивизионы) болды. 2025/26 жылғы маусымда ол 11 матч өткізіп, үш сары және және қызыл қағаз алды. Қорғаушы ойындардың тек 45%-ында ғана негізгі құрамға ілікті.

Африко – Гуаральюстің «Фламенго» клубының түлегі. Отанында «Сантос» пен «Лондрина» сапында өнер көрсеткен. Мансабының басым бөлігін Португалияда («Маритиму», «Эшторил», «Фаренсе») өткізіп, жоғары дивизионда 75 матч ойнады. Әзірбайжандық «Габала» сапында 35 ойын өткізді (бір гол, екі рет алаңнан қуылды).

Бұған дейін бельгиялық, «Қызылжар» клубының бұрынғы қорғаушысы Брайан Ван Ден Богарт «Қайраттың» «Брюггеге» қарсы матчтағы мүмкіндігін бағалаған болатын.