ҚПЛ-дың бельгиялық экс-футболшысы: «Брюгге» «Қайратты» жеңуі тиіс

Бельгиялық, «Қызылжар» клубының бұрынғы қорғаушысы Брайан Ван Ден Богарт ASnews.kz сайтына берген сұхбатында «Қайраттың» «Брюггеге» қарсы матчтағы мүмкіндігін бағалады.

«Нефтчимен» (0:3) болған матчтағы жеңілістің айтарлықтай әсері жоқ, себебі жолдастық кездесулерді Чемпиондар лигасымен салыстыруға келмейді. Еурокубок матчтарында ойыншылардың концентрациясы, қарқыны мен тактикасы мүлде басқа деңгейде болады.

Ал «Брюггедегі» бас бапкердің ауысуы «Қайрат» үшін үлкен қиындық болады. Мұндай жағдайда футболшылар өздерін барынша көрсетуге тырысады, ал команда дайындығы одан әрі күшейе түседі. Сондықтан қазақстандықтар тек ұзақ сапар факторына ғана үміт арта алады», – деді Ван Ден Богарт.

34 жастағы ойыншының айтуынша, бельгиялық команда 5300 шақырымдық жолдан кейін шаршап, концентрациясы төмендеуі мүмкін:

«Мен өзім де Бельгиядан Қазақстанға талай рет ұшып келгенмін, сондықтан түсінемін: алыс сапар пен қалыпқа келуге кететін уақыттың аздығы кері әсерін тигізуі мүмкін. Әсіресе ойынның басында. Дегенмен жалпы болжамым – 70/30 «Брюггенің» пайдасына. Тәжірибе – бәрінен маңызды», – деп қосты ол.

20 қаңтарда алматылықтар Бельгия чемпионатының күміс жүлдегерімен кездеседі. Чемпиондар лигасының жалпы кезеңіндегі жетінші тур ойыны «Астана Аренада» өтеді.

Қазіргі таңда «Брюгге» ЧЛ-ның турнирлік кестесінде 31-орында тұр. Нашар нәтижелерге байланысты клуб бұрынғы бас бапкері Ники Хайенмен қоштасып, хорватиялық маман Иван Леконы тағайындады.

Брайан Ван Ден Богарт «Қызылжар» сапында 22 матч өткізіп, бір нәтижелі паспен көзге түскен.