Канчельскис – қазақ футболы туралы: 5-6 команданы басқарып отырған адамдарды білемін

«Манчестер Юнайтедтің» экс-футболшысы, «Тобылдың» бұрынғы бас директоры Андрей Канчельскис BorodAbata.kz тілшісі Әлім Динасыловқа берген сұхбатында Қазақстан футболындағы проблемаларды атады және Өзбекстан құрамасының 2026 жылғы әлем чемпионатына жолдама алуының сырымен бөлісті.

«Қазақстанда жақсы инфрақұрылым жоқ, бұл айдан-анық нәрсе. Федерацияда футболға қатысы жоқ адамдар жұмыс істейді. Елде футболдың дамуына кедергі келтіретін топтар бар. Мен 5-6 команданы басқарып отырған адамдарды білемін. Бұл Қазақстан футболына тек зиянын тигізеді. Мұны бәрі біледі, бірақ ешкім ештеңе айтпайды. Олар «менің қатысым жоқ, ештеңе білмеймін» деп отыра береді.

Қазір футболға кәсібилігі жоқ адамдар жиі келеді. Мен оларды «Тобылда» жүргенде кездестірдім: Санжар Сейітқазинов пен Әлімжан Қалдияров. Басшылықта кім көрінген жүреді, солардың кесірінен спортта үлкен проблемалар туындайды. Жоғары жақта да футболға мән бермейтін адамдар бар. Оларды тек ақша қызықтырады. Қазақстан олардан құтылған кезде ғана жақсы нәтижеге қол жеткізеді. Неден қорқу керек? Неге ол туралы айтпасқа? Бұл проблемалар туралы бәрі біледі. Қостанай облысының әкімі қайда қарап отыр?

Өзбекстанда алаяқтарды футболдан аластатты, нәтижені көрдіңіздер. Ұлттық құрамасының әлем чемпионатына шығуы өзбектердің алғашқы жетістігі емес. Бұған дейін жастар құрамалары Азия мен әлем чемпионаттарында да нәтиже көрсеткен болатын. Қазақстан да солай істеуі керек. Футболшылар көп болуы керек. Мамандар клубқа алдап, ақша табу үшін келсе, нәтиже болмайды», - деді Канчельскис.

Бұған дейін Өзбекстан құрамасы Орталық Азия елдері арасында бірінші болып әлем чемпионатына жолдама алды.

Канчельскис Қазақстанда 2023 жылы жұмыс істеп кетті.