Алюетов – Чесноковтың «Хартсқа» ауысуы туралы: оны негізгі құрам ойыншысы ретінде шақырды

Қазақстандық бапкер Ринат Алюетов ASnews.kz сайтына берген сұхбатында Қазақстан ұлттық құрамасының көшбасшысы Ислам Чесноковтың шотландиялық «Хартс» клубына ауысуына қатысты пікір білдірді.

«Бұл – барлығымыз үшін және қазақстандық футбол үшін керемет жаңалық! Менің ойымша, оны бастапқыдан-ақ негізгі құрам ойыншысы ретінде шақырған әрі солай қарастырған. «Хартс» бапкерінің сұхбатына қарағанда, ол Исламды асыға күткен.

Сондықтан Исламды жақсы білетін адам ретінде сенімді түрде айта аламын: ол негізгі құрамнан орын алып, командадағы көшбасшы ойыншылардың біріне айналу үшін бар күшін салады», – деді Алюетов.

Чесноковтың Эдинбург клубымен жасаған келісімшарты 2028 жылдың жазына дейін жарамды.

Бұған дейін Қазақстан құрамасының экс-баспасөз хатшысы әрі белгілі журналист Ермұхамед Мәулен де футболшының «Хартсқа» ауысуына қатысты пікір білдірген болатын.