Ла Лига мен А сериясының экс-шабуылшысы: Джонс «Қайсарда» жасындай жарқылдайды

«Сельта» мен «Кальяри» командаларының бұрынғы шабуылшысы Хоакин Ларривей ASnews.kz сайтына берген сұхбатында «Кайсардың» жаңадан келген чилилік ойыншысы Томас Джонстың қасиеттері туралы айтты.

«Ол нағыз кәсіби футболшы және тек гол соғып қана қоймай, сонымен қатар ассист жасай алатын шабуылшы. Томастың екі аяғы да мықты және дәл соққы жасай алады. Ол бұрынғы командаларының жетістікке жетуінде маңызды рөл атқарды, ал жеке өміріне келсек, ол қарапайым, кішіпейіл жігіт. Мен оның Қазақстанда дүркірейтініне күмәнданбаймын», – деді тәжірибелі ойыншы.

«Қасқырлар» шабуылшыны еркін агент ретінде алды. Ол бұған дейін «Копьяпо» сапында 34 матчта 14 гол соғып, 3 нәтижелі пас берді. «Магальянес» сапында ойнаған кезде Чили чемпионы атанды, ел кубогы мен суперкубогын жеңіп алды.

Ларривейдің Еуропада тәжірибесі мол. 41 жастағы аргентиналық шабуылшы Ла Лига мен А сериясында 166 ойын өткізіп, 35 гол соққан. Шабуылшы «Барселона» мен «Интер» сияқты топ-клубтардың қақпасынан саңылау тапқан.

Бұған дейін Джонстың бұрынғы командаласы Джон Сантандер ойыншының қазақстандық клубқа ауысуына қатысты пікір білдірген болатын.