Алюетов – Чесноков туралы: «Тобыл» оны жайдан-жай жібергісі келмейді

Қазақстандық жас бапкер Ринат Алюетов YouTube-тағы BorodAbata арнасына берген сұхбатында Ислам Чесноковқа шетелдік клубтардан түскен ұсыныстар жайлы пікірімен бөлісті.

– Естуімше, Исламға Дания, Түркия және Ресейден ұсыныстар болған. Ол сізден бұл туралы сұрады ма?

– Ия, оған бірнеше клубтан ұсыныс түсті. «Тобылмен» байланысқа шығып, өтемақы ұсынғандар да болды. Бірақ олардың ақшасы клуб басшылығының көңілінен шықпады. Ол өзін Қостанайда көрсеткендіктен, клуб оны жайдан-жай жібергісі келмейді.

– Футболшының өсуіне кедергі келтіруге болмайды ғой. Клуб мемлекеттен қаржы алып отырғандықтан, оның трансфері үшін үлкен ақша сұрамауы керек. Оның Еуропаға кетуі Қазақстан футболы үшін үлкен пайда емес пе?

– Сізбен келісемін. Самородовты алайықшы. Ол үшін «Ахмат» жақсы ақша төледі. Сол себепті де Оразов пен Самородов маусым ортасында «Ақтөбеден» кетіп қала салды.

Біздегі жағдай да осындай. Ислам кеткісі келеді, футболшы ретінде өсуді қалайды. Кез-келген клуб мұндай сәтте пайда тапқысы келеді. Біз олардың бұл шешімін дұрыс не бұрыс деп айта алмаймыз. Мұндай кезде футболшы мен оның агенті клуб басшылығымен кездесіп, өзара келісуі қажет.