Ислам Чесноков – шетелдік клубтың ұсынысы жайлы: Олардың ұсынған ақшасы «Тобылдың» көңілінен шықпады

«Тобыл» мен Қазақстан құрамасының жартылай қорғаушысы Ислам Чесноков YouTube-тағы BorodAbata арнасына берген сұхбатында шетелдік клубтардан түскен ұсыныстар жайлы айтып берді.

– Жақында саған словакиялық ДАК клубынан ұсыныс түсті. Тіпті ресми келіссөздер де өтіп, ақыр соңында қос клуб трансфер құнын келісе алмапты. Бұл саған қалай әсер етті және сен сол сәтте басшылықпен сөйлестің бе?

– Иә, ұсыныс болды. Бұл туралы білемін. Олардың ұсынған ақшасы «Тобылдың» көңілінен шықпады. Басшылықпен де сөйлестім. Олар менен биыл командада қалып, еуроккбокке шығу үшін көмектесуімді сұрады.

– Ал «Ахматтан» басқа, Ресейден ұсыныс болды ма?

– Жоқ, Ресейден маған хабарласып, қызығушылық танытқан клубтар болмады. Тек «Ахмат» қана болды.

– «Ахматқа» қаралымға бару туралы нұсқа қалай пайда болды?

– Мен Беларусь чемпионатында ойнаған кезде «Шахтер Солигорскті» Сергей Ташуев жаттықтырды. Тіпті біздің «Белшинаға» қарсы ойыннан кейін мені мақтап, сұхбат берді. Содан кейін агентім маған басқа клубқа ауысатын мүмкіндіктің болатынын айтты. Беларусьтегі маусым аяқталғаннан кейін «Ахматпен» бірге оқу-жаттығу жиынына баратынымды білдім. Маған Беларусьтің бір топ-командасы да ұсыныс жасады. Бірақ «Ахматтан» кейін Милич Чурчич менімен байланысқа шығып, «Тобылға» шақырды.

25 жастағы футболшы 2023 жылдың басында «Белшинадан» кетіп, қаралымнан өту үшін «Ахматқа» барды. Бірақ ақыр соңында қостанайлық «Тобылға» ауысты.