«Реал» ойыншысының агенті – Тұяқбаев туралы: ол Сәтпаевтан кем түспейді

Испаниялық футбол агенті Алехандро Парра ASnews.kz сайтына берген сұхбатында Азамат Тұяқбаевтың Дастан Сәтпаев сияқты талантты екенін айтты.

«Қателесуім мүмкін, бірақ менің ойымша, Азамат таланты жағынан Дастаннан кем түспейді. Ол жас болғанына қарамай, салқынқанды футболшы және әрқашан гол соғуғы тырысады, мұны біз «Пафосқа» қарсы ойында көрдік. Оның тепкен доптары шынымен де қауіпті шықты. Менің ойымша, Тұяқбаевқа жастардың дамуына басымдық беретін ұзақ мерзімді жоба қажет», – деді Парра.

Испаниялық маман 18 жастағы шабуылшыны Еуропаға ауысады деп болжауда:

«Егер ол мансабын Италияда немесе Испанияда жалғастырса, ойын уақытын алатынына сенімді болуы керек. Мен Азаматты Исак Вурал сияқты дамытып, басқа жаққа сата алатын «Палермо» немесе «Фрозиноне» сияқты клубтарға ауысқанын қалар едім. Қазақстандықтың футбол IQ-ы ғаламат екен».

Тұяқбаев Чемпиондар Лигасындағы дебютін «Пафосқа» қарсы матчта жасады. Ол бұған дейін ҚПЛ-да «Жетісу» командасына (5:0) гол соққан болатын.

Вурал - Түркия жастар құрамасының жартылай қорғаушысы. «Фрозиноне» сапында В сериясында бір маусым өткізгеннен кейін, 19 жастағы футболшы «Пизаға» ауысты. Биыл жазда италиялық клуб оны 4,5 миллион еуроға сатып алды.

Парраның Серхио Каналес және Хуан Лариос сияқты футболшылармен жұмыс істейтін Global Goal атты агенттігі бар. ASnews.kz хабарлауынша, дәл осы агенттік Тұяқбаевқа қызығушылық танытып отыр.

Бұған дейін «Парра» «Қайрат» қақпашысы Темірлан Анарбековтің болашағына баға берген болатын.