Британдық сарапшы – Тұяқбаев туралы: оның әлеуеті бар

Британдық сарапшы және All Things Sky Blue подкастының жүргізушісі Гленн Уоткин ASnews.kz тілшісіне берген сұхбатында «Ковентри Ситидің» Азамат Тұяқбаевқа қызығушылығы туралы пікір білдірді.

«Азамат керемет өнер көрсетуде. Маған оның допты қорықпай ұстайтыны ұнайды, сондықтан қызығушылықтың болатыны анық. Тұяқбаев әлі шикі болса да, «Спортингке» қарсы дублі мен «Реалға» қарсы жанқияр ойыны оның әлеуеті бар екенін көрсетеді. Азаматтың техникасы мықты, епті және қарсыластың айып алаңында тәуекелге барудан қорықпайды», – деді Уоткин.

Эксперттің айтуынша, 18 жастағы Тараздың тумасы Англияда жетістікке жетуге қабілетті:

«Әрине, Чемпионшип ол үшін үлкен серпіліс болар еді: ол жақтағы қысым мен талап мүлдем басқаша, бірақ бапкердің көмегімен және біраз ойнаса, Тұяқбаев бейімделіп кетеді. Оның өзіндік ойын стилі бар, шешім қабылдай біледі, бұл ағылшын футболына өте қажет дүние. Бастапқыда негізгі құрамда ойнамауы мүмкін, бірақ болашақта – неге ойнамасқа?».

ASnews.kz хабарлағандай, Чемпионшиптегі «Ковентри Ситидің» скауттары Тұяқбаевты УЕФА Жастар лигасында «Спортингке» қарсы ойынынан кейін (2:3) бақылап отыр. Азамат ҚПЛ аясында «Жетісу» қақпасына да гол соқты (5:0).

Жас ойыншының «Қайратпен» келісімшарты осы жылдың соңына дейін есептелген.