Ербол Қайыров: неліктен маңызды матчтарға семейлік инспекторлар тағайындалады?

Журналист, комментатор және ҚФФ президенттігіне үміткер болған Ербол Қайыров чемпионаттың шешуші кезеңінде орын алатын төрешілерге қатысты мәселені көтерді, деп хабарлайды ASNews.kz (BorodAbata).

«Чемпионаттың соңында командалар әр-түрлі қулықтарға баратынын бәрі біледі. Әсіресе еурокубоктарға ілігу, медальдар мен ұшып кетпес үшін клубтар төрешілермен және басқа командалармен сөйлесуге дайын. Осы мәселені әріптесім Ермұхамед Мәулен талай көтерді. 

Мысалы, кеше Алматыда көбісі «Елімайдың» басшылығының өкілін көріп қалды. Ол не үшін келді? «Ақтөбе» мен «Елімайды» бір ғана ұпай айырмашылығы бөліп тұр. Екеуі де Конференция лигасында өнер көрсетуге мүмкіндік беретін төртінші орын үшін таласып жүр. Төрешілермен оп-оңай сөйлесіп көрсе ше? 

Бельгияға ұлттық құрамамен бірге ұшып барған «Елімайдың» басшылығына журналистер осыған қатысты бірнеше сұрақтар қойды. Федерация тарапынан көмек көрсетіліп жүр ме? 

«Астана»-«Елімай» және «Ақтөбе»-«Қайрат» ойындарын не біріктіреді? Бақылаушылар – Семей қаласының тумалары. Кездейсоқтық па? Кім жауап бере алады?» – деді Қайыров.

14 қыркүйекте ҚПЛ 23-туры аясында екі матч өтеді. Сағат 17:00-де «Қайрат» өз алаңында «Ақтөбені» қабылдаса, 19:00-де «Астана» «Елімаймен» кездеседі.