«Атлетико Мадрид»–«Барселона»: қонақтар есе қайтаруға тырысады

15 сәуірге қараған түні «Атлетико» Чемпиондар лигасы 1/4 финалының қарымта матчында «Барселонаны» қабылдайды, деп хабарлайды ASnews.kz.

«Атлетико Мадрид»

Диего Симеоне командасв жауапты ойынға маңызды басымдықпен келеді. Алғашқы матчта мадридтік клуб Барселонада 2:0 есебімен жеңіске жетті: Пау Кубарси алаңнан қуылғаннан кейін Хулиан Альварес пен Александер Сёрлот гол соқты.

Сонымен бірге команданың қазіргі формасы тұрақты емес. Чемпиондар лигасында «Барселонаны» жеңгеннен кейін мадридтіктер чемпионатта «Севильядан» жеңілді, ал оған дейін Ла Лигада дәл осы «Барселонадан», сондай-ақ «Реал» мен «Тоттенхэмнен» ұтылған еді.

«Барселона»

Каталондық клуб жауапты матчқа қиын жағдайда келіп отыр: өз алаңындағы 0:2 есебіндегі жеңілістен кейін енді екі гол айырмасын қайтаруы керек. Ойын алдында Ламин Ямаль камбэк жасау мүмкін екенін айтып, команданың әлі де келесі кезеңге шығуға сенетінін жеткізді.

Соңғы нәтижелерге қарасақ, бұл матч алдында «Барселонаның» жақсы ойындары да болды: команда чемпионатта «Атлетиконы» жеңді, «Эспаньол» мен «Райо Вальеканоны» ұтты, ал оған дейін «Ньюкаслды» ірі есеппен жеңген еді. Бірақ алғашқы матчтағы 0:2 есебі каталондықтарды алғашқы минуттардан бастап тәуекелге баруға мәжбүрлейді.

Фактілер мен сандар

• Алғашқы матч «Атлетиконың» 2:0 есебіндегі жеңісімен аяқталды.
• «Атлетико» тоғыз жылдан кейін алғаш рет Чемпиондар лигасының жартылай финалына шығуы мүмкін.
• «Барселона» соңғы матчында «Эспаньолды» 4:1 есебімен ойсырата жеңді.

ASnews.kz болжамы

Алғашқы матчтың нәтижесіне қарай, жауапты ойынға «Атлетико» әлдеқайда ыңғайлы жағдайда келеді. Дегенмен «Барселона» алғашқы минуттардан-ақ қысым жасап, тәуекелге барады. «Атлетиконың» соңғы уақытта тұрақсыз нәтиже көрсетіп жүргенін және соңғы турда жеңіліп қалғанын ескерсек, каталондықтардың бұл матчта жеңіске жетуге мүмкіндігі бар.

• Негізгі болжам: «Барселонаның» жеңісі
• Альтернативті болжам: Екі команда да гол соғады – иә