«Андерлехт» форварды: «Қайрат» ұшып кетті деп санау әлі ерте

Бельгиялық «Андерлехттің» чехиялық шабуылшысы Лукаш Амброс ASnews.kz сайтына берген сұхбатында Еуропа лигасы квалификациясының плей-офф кезеңіндегі «Қайратты» жеңгені (3:0) туралы пікір білдірді.

Ойынның бетбұрысты сәті туралы

«Жылдам соғылған гол ойынымызды жеңілдетіп жіберді деп айта алмаймын, бірақ ол сабырлылық пен сенімділік сыйлады. Ойынның басты бетбұрысты сәті – қарсыластың алаңнан қуылған кезі болды. Осыдан кейін біз допты толық бақылауға алып, бірінен соң бірін қауіпті сәттер жасауға тырыстық. Бұдан да көп гол соғуға болар еді, бірақ жалпы нәтиже жақсы», – деп атап өтті шабуылшы.

Көгалдың жағдайы мен Канье Уэстің концерті туралы

«Алаңның сапасы ма? Әдетте қалай болатынын білмеймін, бірақ жақында мұнда Канье Уэстің концерті өткенін естідім. Шын мәнінде, алаң ойын алдында барлығы айтқандай соншалықты жаман болмай шықты. Әбден ойнауға болатын қалыпты майдан», – деді чехиялық легионер.

Қарымта матч және ПАОК-пен салыстыру туралы

«Қазір ең бастысы – қарсыласты менсінбеушіліктен аулақ болу. 3:0 есебімен алда тұрып, босаңсу – бұл жасауға болатын ең жаман қателік, өйткені футболда бәрі мүмкін. Қуанышымызға орай, екі еурокубоктық кездесу арасында бізде чемпионат матчтары жоқ, сондықтан қарымта ойынға 100 пайыз дайындала аламыз.

«Қайратты» ПАОК-пен салыстыру қиын. Алматыдағы ойынның басым бөлігін сан басымдығында өткіздік, сондықтан қандай да бір терең қорытынды жасау онша дұрыс болмас еді», – деп түйіндеді сөзін Амброс.

«Андерлехт» Алматының Орталық стадионында «Қайратты» 3:0 есебімен ұтты. Яакко Оксанен автогол авторы атанса, алматылықтар қақпасына қалған екі допты Лукаш Амброс пен Даниил Сикан соқты.

Матчтың 38-минутында алаң иелерінің қорғаушысы Александр Широбоков қызыл қағаз алды.

Еуропа лигасының негізгі кезеңіне шығу құқығы үшін қарымта кездесу 27 тамызда Брюссельде өтеді.

«Андерлехт» бапкері – «Қайратты» жеңгені жайлы: әлі ештеңе шешілген жоқ