Ван ‘т Схип пен Скотт Манн «Қайраттың» Түркістандағы матчын тамашалауда

Қазақстан ұлттық құрамасының бас бапкері Джон ван ‘т Схип пен ҚФФ бас хатшысы Скотт Манн «Қайраттың» Чемпиондар лигасы іріктеуіндегі софиялық «Левскиге» қарсы кездесуіне қатысып жатыр, деп хабарлайды ASnews.kz.

Түркістанда өтіп жатқан бұл ойын нидерландылық маман үшін елдегі стадиондардан тамашалаған үшінші матч болды. Бұған дейін ол Талдықорғанда өткен 21-турдағы «Жетісу»—«Ордабасы» (0:4) бәсекесін және елордадағы «Астана»—«Оқжетпес» (1:2) арасындағы турдың орталық кездесуін тамашалаған еді.

Ақпарат жарияланған сәтте «Левски» 1:0 есебімен алда келеді.

Командалар арасындағы Болгарияда өткен бірінші кездесу де алаң иелерінің 1:0 есебіндегі жеңісімен аяқталған болатын.

Түркістанға ауысу себебі: Еске сала кетейік, алматылық «Қайрат» америкалық рэпер Канье Уэсттің концертіне дайындыққа байланысты Чемпиондар лигасының үшінші іріктеу кезеңіндегі бұл үй матчын «Түркістан Аренада» өткізуге мәжбүр болды.