«Партизанның» қиындықтары бар»: ҚПЛ-дың сербиялық экс-қорғаушысы – «Тобылмен» өтетін матч туралы

ҚПЛ клубтарының сербиялық бұрынғы қорғаушысы Марко Николич ASnews.kz басылымына берген сұхбатында Конференция лигасының үшінші іріктеу кезеңіндегі қостанайлық «Тобыл» мен белградтық «Партизан» текетіресіндегі мүмкіндіктерді бағалады.

«Партизанның» бабы туралы

«Партизан» қазір қиын кезеңді бастан өткеріп жатыр, өйткені олардың чемпионаттағы жағдайы мәз емес. Өткен маусымда мен Кубокта олардың қақпасына гол соқтым, содан кейін олар жарыстан шығып қалды және содан бері командада сәтсіз нәтижелер сериясы басталды. Тіпті Срджан Благоевичті де жұмыстан босатты, бірақ әлі күнге дейін тиісті ойын ырғағын таба алмай келеді. Дегенмен оларда алаңда айырмашылық жасай алатын жекелей мықты бір-екі футболшы бар.

Мен айтқандай, белградтықтардың соңғы уақыттағы нәтижелері таңғалдырмайды, бірақ «Партизан» жейдесінде ойнаудың үлкен жауапкершілігі бар. Олар жеңіс үшін соңына дейін күреседі, өйткені әр матчта жеңіске жетуге еті үйренген. Дәл осы фактор мен клуб тарихына байланысты мен олардың келесі кезеңге өту мүмкіндігін сәл де болса жоғары бағалаймын».

«Тобыл» қарсыласын таңғалдыра ала ма?

«Қостанайлықтар «Партизанды» әсіресе өз алаңындағы матчта таңғалдыруға толықтай шамасы шетеді – сербиялық клубты өте ұзақ әрі ауыр сапар күтіп тұр. Дегенмен Белградтағы өз аренасында лық толы стадион мен керемет атмосфера күтемін, бұл «Партизан» ойыншыларына жеңіске жетуге көмектеседі», – деді Николич.

Конференция лигасының үшінші іріктеу кезеңі аясындағы «Партизан» мен «Тобыл» арасындағы алғашқы матч 6 тамызда Белградта, ал қарымта ойын 13 тамызда Қостанайда өтеді.

28 жастағы сербиялық қорғаушы Марко Николич 2023 және 2024 жылғы маусымдарда павлодарлық «Ақсу» сапында 11 ойын және түркістандық «Тұран» сапында 26 матч өткізді. Сонымен қатар оның карьерасында сербиялық «Рад» пен «Мачва», венгриялық «Будафоки» мен «Дебрецен», әзірбайжандық «Сабаил» клубтары болған, ал қазіргі уақытта ол таиландтық «БГ Патум Юнайтед» сапында өнер көрсетеді.

«Чемпионшипке кетуі де мүмкін еді»: Чесноковтың агенті – «Хартстан» кету себептері туралы