«Қарсыласты сыйлаймыз, бірақ ешкімнен қорықпаймыз»: Уразбахтин «Левскимен» өтетін матч пен «Қайраттың» трансферлері туралы

Алматылық «Қайраттың» бас бапкері Рафаэль Уразбахтин матч алдындағы баспасөз мәслихатында Чемпиондар лигасының үшінші іріктеу кезеңі аясында софиялық «Левскиге» қарсы өтетін кездесуді егжей-тегжейлі талдап берді, деп хабарлайды ASnews.kz.

«Левскидің» чемпиондығы кездейсоқ емес, бірақ бізде тәжірибе бар»

«Өте күрделі матч күтіп тұр, өйткені мықты қарсыласпен кездесеміз. Олардың күш-әлеуетін өте жақсы түсініп, сезініп отырмыз. Біз «Левски» туралы ақпаратты жеткілікті деңгейде білеміз және команданы егжей-тегжейлі зерттеп үлгердік деп санаймын – бұған уақыт жеткілікті болды.

Болгария футболында не болып жатқанын білеміз: ұзақ уақыт бойы ол жақта «Лудогорец» үстемдік етті, бірақ «Левскидің» чемпион атануы – кездейсоқтық емес. Олардың шабуыл шебі мықты әрі жылдам. Кімнің есебінен және қалай ойнайтынын түсінеміз. Қарсыласты сыйлаймыз, бірақ сонымен бірге ешкімнен қорықпаймыз.

«Левскидің» елдегі ең үлкен жанкүйерлер базасына ие екенін және олардың өз командасын өте қызу қолдайтынын естідік. Көптеген командалар бұл қысымға төтеп бере алмайды, бірақ бізде 50-60 мың көрермен жиналған үлкен стадиондарда ойнаудың бұрынғы тәжірибесі бар».

Болгариялық із және матчтың Түркістанға ауысуы

«Бізді қызықты тарихи параллельдер байланыстырады. Станимир Стоиловтың қандай үлкен із қалдырғаны есімізде – ол алдымен «Левскиді», содан кейін «Астананы» Чемпиондар лигасына шығарды. Біз мұны бағалаймыз және құрметтейміз. Сондай-ақ Қазақстанда Димитар Димитров жұмыс істеді, ал Николай Костовпен біз қарсылас ретінде кездескенбіз.

Матчтың ауыстырылуына келсек: біздің үйдегі ойынымыз басқа қалада өтетіндей жағдай қалыптасты. Егер Алматыда ойнағанымызда, бізге көмектесетін жанкүйерлерімізге қатты үміт артар едік. Бірақ бұл жағдайды қабылдап, екі кездесуге дайындалу ғана қалып отыр».

Жаңа трансферлер мен Бекболаттың прогресі

«Клуб трансферлермен айналысып жатыр. Бізде легионерге арналған бос орын бар, сондықтан біздің мүмкіндіктеріміз бен стилімізге сай келетін ойыншыларды іздестіру жүріп жатыр.

Исмаил Бекболатқа келетін болсақ, ол соңғы матчтарда өзін өте жақсы көрсетіп жүр, Чемпиондар лигасының ойынында да көзге түсті. Ол үшін бұл матчтар – үлкен мектеп және орасан зор тәжірибе. Осындай деңгейдегі жекпе-жектердің арқасында оның әрі қарай прогреске жетіп, дами түскені маңызды», – деді Уразбахтин.

Чемпиондар лигасының үшінші іріктеу кезеңі аясындағы «Левски» мен «Қайрат» арасындағы алғашқы матч 4 тамызда Софиядағы «Георги Аспарухов» стадионында өтеді. Қарымта кездесу 11 тамызда Түркістанда өтеді.

«Бізді көргенде таңғалды»: Гонконгта қазақстандық жанкүйерлер Дастан Сәтпаевпен кездесті (видео)