«Бізді көргенде таңғалды»: Гонконгта қазақстандық жанкүйерлер Дастан Сәтпаевпен кездесті (видео)

Лондондық «Челсидің» 17 жастағы қазақстандық шабуылшысы Дастан Сәтпаев маусымалды турне аясында командамен бірге Гонконгқа келіп, осындағы отандастарымен кездесті, деп хабарлайды ASnews.kz.

«Оның қарапайымдылығына тәнті болдық»

Жас шабуылшы кездесу барысында жанкүйерлерге автограф таратып, отандастарымен тілдесті. Гонконгта тұратын қазақстандық жанкүйерлердің бірі «Қайрат» мектебінің түлегімен жүздесуден алған әсерін бөлісті:

«Кеше «Челсидің» Гонконгқа келгені туралы видео шыққанда, пікірлерде біреу команда тоқтайтын қонақүйді жазып жіберіпті. Оған дейін де «көктердің» ойыншыларымен жүздесуді жоспарлап жүрген едім. Гонконгта Дастанды қолдайтындар бар екенін көрсеткіміз келді. Кездесуге алдын ала дайындалдым: «Қайраттың» жейдесін алып, «Челсидің» джерсиін сатып алып, қонақүйге бардым. Не күтерімді білмедім.

Дастан – өте бір азамат жігіт, біз оның қарапайымдылығына риза болдық. Өзі де бізді көргенде таңғалып, тіпті толқып кетті. Ең бастысы – қазақтар қайда жүрсе де, бірін-бірі әрдайым қолдайды», – деді жанкүйер.

Дастан Сәтпаевтың қазақстандық фанаттарға автограф беріп жатқан видеосы

Сәтпаевтың табысы мен «Челсидің» кестесі

Австралиядағы оқу-жаттығу жиынын аяқтаған «көктер» Гонконгқа табан тіреді. Бұл жақта 5 тамыз күні туриндік «Ювентусқа» қарсы жолдастық кездесу өткізеді. Осы ойыннан кейін лондондықтар Индонезияға аттанады.

Еске сала кетейік, Дастан Сәтпаев «Челсидің» Сиднейдегі қос матчына да қатысты:

• «Вестерн Сидней Уондерерспен» өткен ойында (6:4) шабуылшы негізгі құрамда алаңға шығып, лондондықтар сапындағы дебюттік голын соқты.

• «Тоттенхэмге» қарсы бәсекеде (1:2) қазақстандық форвард 70-минутта алаңға шықты.

Дастан Сәтпаев: өмірбаяны, толық ақпарат, жалақысы, жеке өмірі. «Челси» сапындағы алғашқы голы