«Софияда «Қайратқа» өте қиын болады»: ҚПЛ-дың бұрынғы қорғаушысы – ЧЛ-дағы «Левскиге» қарсы матч туралы

«Левски» мен ҚПЛ клубтарының бұрынғы қорғаушысы Пламен Димов ASnews.kz басылымына берген сұхбатында Чемпиондар лигасының іріктеу кезеңіндегі «Қайрат» пен болгариялық клуб арасындағы алдағы текетірес туралы өз пікірін білдірді.

«Левски» бабында әрі испандық бапкері бар

«Левски» – Болгариядағы ең үлкен әрі жанкүйерлер базасы ең көп команда. Олар 17 жыл бойы чемпион болған жоқ, бірақ қазір қарқыны өте жоғары: команда, жанкүйерлер және басшылық – бір тұтас ұжымға айналған.

Оларда өте мықты әрі тұрақты команда құрған испандық бас бапкер Хулио Веласкес жұмыс істейді. «Левски» өте жақсы бабында, олардың ойыны өте қарқынды. Ішкі чемпионат үшін олар өте сапалы легионерлер сатып алды және үш матчтың үшеуінде де жеңіске жетті».

«Қайраттың» мүмкіндігі мен ыстық жанкүйерлер факторы

«Мен биыл «Қайраттың» матчтарын көп көре қойған жоқпын, бірақ олар өткен жылғыдан әлсіздеу сияқты. Иә, Түркістандағыдай мұндай аптап ыстықта ойнау өте қиын, бірақ бұл амалсыз жағдай – олар бәрібір кәсіпқойлар, сондықтан ауа райы оларға әсер етпеуі тиіс.

Мен «Левскиде» екі жарым жыл ойнадым, онда тамаша әрі өте эмоционалды жанкүйерлер бар. Софияда «Қайратқа» өте қиын болады», – деді Димов.

35 жастағы қорғаушы 2015–2021 жылдар аралығында ҚПЛ-да өнер көрсетіп, қызылордалық «Қайсар», қарағандылық «Шахтер», семейлік «Алтай» және көкшетаулық «Оқжетпес» клубтарының намысын қорғаған.

«Левски» – Болгарияның 27 дүркін чемпионы: «Қайрат» ЧЛ үшінші іріктеу кезеңінде кіммен ойнайды?