Семак – ЧЛ-да «Қайратты» күшейту туралы: «Зениттің» құрамындағы кез келген ойыншы көмектесе алар еді

Санкт-петерборлық «Зениттің» бас бапкері Сергей Семак ASnews.kz сайтына берген сұхбатында Чемпиондар лигасында сәтті өнер көрсету үшін өз командасынан кім алматылық «Қайратты» күшейте алатыны туралы сұраққа жауап берді.

– Оқтын-оқтын «Зениттің» бұрынғы ойыншылары «Қайратқа» ауысып жатады. Қағаз жүзінде, Чемпиондар лигасы қарсаңында алматылық клубты күшейту үшін кімді берер едіңіз?

– Біздің командамыз өте мықты деп есептеймін. Негізгі құрамда ойнайтын немесе негізгі тізімде бар ойыншылардың барлығы дерлік «Қайратқа» сай келіп, командаға көмектесе алар еді. Бірақ «Қайраттың» өзінде де жақсы футболшылар бар. Ойыншылар барынша тез бейімделіп, Чемпиондар лигасында ойнап кетуі үшін бапкердің талаптарын, оның жігіттерге қоятын міндеттеріне қандай футболшылар сай келетінін түсіну қажет.

Еске салайық, аяқталған Чемпиондар лигасының жалпы кезеңінің қорытындысы бойынша «Қайрат» турнирлік кестеде соңғы, 36-шы орынға тұрақтады. Өткізілген сегіз турда қазақстандық клуб жеті рет жеңіліп, бір рет тең түсті. Осылайша бір ұпай ғана жинады (испаниялық «Вильярреал» да дәл осындай нәтиже көрсетті).

2026/27 жылғы маусымда да алматылықтар ҚПЛ жеңімпазы мәртебесінде өз жолын Чемпиондар лигасының бірінші іріктеу кезеңінен бастайды.

Бұған дейін Семак «Қайраттың» еурокубоктардағы өнерінен алған әсерімен бөлісті.