Желькович – «Ақтөбеге» мақсаттары жайлы: еурокубоктарға шыққымыз келеді

«Ақтөбе» шабуылшысы Айдын Желькович ASnews.kz сайтына берген сұхбатында Қазақстанға ауысуын мансабындағы «алға жасалған қадам» деп бағалап, командамен бірге еурокубоктарда өнер көрсеткісі келетінін жеткізді.

«Қазақстанға көшу – мен үшін үлкен өзгеріс және алға жасалған қадам. «Ақтөбе» еуропалық додаларда ойнап жүрді. Командамен еурокубоктарға қатысу – менің мақсаттарымның бірі. Құдай қаласа, осыған қол жеткіземіз деген үміттемін», – деді шабуылшы.

2021 жылы Желькович 18 гол соғып, Швеция чемпионатының төменгі дивизионында үздік сұрмерген атанған болатын. Ол бұл жетістікті Қазақстанда да қайталауға ниетті:

«Бұйырса, «Ақтөбе» сапында да үздік атанатыныма сенемін. Қолымнан келетін нәрсенің барлығын жасаймын, командаға көмек беруге тырысамын және көп гол соғуға ұмтыламын. Осы маусымның соңында статистиканы салыстырамыз».

Сондай-ақ, шабуылшы өзінің кумирлері туралы да сөз қозғады.

«Бала кезімнен Ибрагимовичтің ойындарын қарайтынмын. Сол кездері швециялық балалардың 90%-ы Златанға ұқсағысы келді. Екінші орынға Эдин Джеконы қоя алар едім. Иә, менің бойым олардікіндей ұзын емес, бірақ олардан кейбір аспектілерді үйренуге тырысып жүрмін», – деді Желькович.

Еске салайық, Айдын Желькович «Ақтөбеге» швециялық «Вернаму» клубынан ауысты. Transfermarkt порталы 28 жастағы ойыншыны 600 мың еуроға бағалайды.

Бұған дейін «Ақтөбе» басқармасының бұрынғы төрағасы Сергей Куленко португалиялық футболшы Луиш Нанидің келуіне қатысты күмәнін білдірді.