Куленко – «Ақтөбенің» Наниді алуы жайлы: бұл – пиар, бірақ мақсатын түсінбедім

«Ақтөбе» басқармасының бұрынғы төрағасы Сергей Куленко ASnews.kz сайтына берген сұхбатында португалиялық футболшы Луиш Нанидің келуіне қатысты күмәнін білдірді.

«Осындай бір ескі мақал бар: біреу рояльде ойнауы керек, ал біреу оны тасуы керек. Меніңше, қазір негізінен сол рояльде ойнайтындар шақырылып жатқан сияқты.

Кешіріңіздер, бірақ оны кім тасиды? Кім жүгіріп, алаңда нәтиже шығарады? Бір-екі ардагер болғаны жақсы, бірақ олар тым көп болса... Мұның соңы неге әкелерін білмеймін».

Клубтың экс-басшысы жаңа басшылықтың түпкі мақсатын түсінбейтінін мойындады.

«Иә, Нанидің келуі – бұл пиар. Бірақ бұл пиардың мақсаты қандай? Ешкім жаңа төрағаның ойын оқып, не қалайтынын біле алмайды. Қадам жақсы-ақ, бірақ әзірге стратегияны көріп тұрған жоқпын.

Ардагерлерге физикалық тұрғыдан өте қиын болады. Қазір жастардың деңгейі, әсіресе физикалық жағынан әлдеқайда жоғары. Тәжірибе деген керемет, бірақ құр тәжірибемен алысқа бара алмайсың».

Сондай-ақ, Куленко жұлдызды жаңа ойыншылардың денсаулығы мен мотивациясына қатысты мәселелер туындауы мүмкін екенін ескертті.

«Бір ойыншы команда емес. Ол ұзақ қашықтықта өзін қалай көрсетеді? 2-3 айдан кейін жарақат алып қалса ше? Немесе жай ғана: «жігіттер, рақмет, мен үйге қайттым» десе ше? Әзірге ештеңе түсініксіз. Бәрі ойдағыдай болсын деп тілеймін, бірақ сұрақ өте көп», – деп қорытындылады Сергей Куленко.

Еске салайық, Куленко 2024 жылы «Ақтөбе» басқармасының төрағасы қызметін атқарған. Бұған дейін функционер «қызыл-ақтардың» басқару саясатын сынаған болатын.