«Арсеналдың» экс-футболшысы «Қайраттың» мүмкіндігін бағалады

«Арсенал» клубының бұрынғы жартылай қорғаушысы Александр Глеб ASnews.kz сайтына берген сұхбатында Чемпиондар лигасындағы алматылық «Қайратқа» қарсы матч жайлы пікірімен бөлісті.

«Қайраттың» жеңіске жету мүмкіндігі өте аз. «Эмирейтс» стадионына шыққанда бірден жанкүйерлердің дауысын, аренаның энергиясын сезесің.

Әрине, оңай болмайды. Мұндай атмосферадан ләззат алып, команда өз футболын ойнауы керек. Тек қорғаныста отырып алу нәтиже бермейді. «Арсенал» техника әрі комбинацияға негізделген ойын көрсетеді, сондықтан қарсыласқа қиын болады», – деді Глеб.

Александр Глеб 2000-жылдардың ортасында «канонирлер» үшін маңызды ойыншы болды. Ол лондондық клуб сапында 130 матч өткізіп, 10 гол соқты, 21 нәтижелі пас берді.

2018 жылы Глеб «Қайраттың» жаттығу жиынында болған, алайда тараптар келісімшарт талаптарын келісе алмаған.