«Брюгге» ойыншылары Астана әуежайында бес сағат тұрған: бұл өте ауыр сапар болды

«Брюгге» клубы «Қайратты» 4:1 есебімен жеңгеннен кейін Астанадан дер кезінде ұшып кете алмады, деп хабарлайды ASnews.kz.

Иван Леко баптайтын команда Бельгияға аттанар алдында Астана әуежайының күту залында шамамен бес сағаттай тұрған. Астанада ауа температурасы -17 градусқа дейін төмендегенімен, рейстің кешігуіне ұшақ қозғалтқыштарының қатып қалуы себеп болған.

«Бізге ұшақтың ұша алмайтынын айтты. Жалпы жолға кеткен уақытымыз 13 сағатқа созылды. Бұл өте ауыр сапар болды», – деді жолаушылардың бірі.

Чемпиондар лигасының жетінші турында «Брюгге» «Астана Аренада» «Қайратты» ойсырата жеңді. Осы нәтижеден кейін алматылық команда турнирдің плей-офф кезеңіне шығу мүмкіндігінен толықтай айырылды.

Маусымдағы соңғы матчта Қазақстан чемпионы Лондонның «Арсенал» клубымен кездеседі.