Эксперт – «Брюггенің» қазіргі жағдайына ашулы: тек есуас адам ғана осы нәтижені болжай алады

Бельгиялық журналист әрі VTM Nieuws арнасының жүргізушісі Ярно Берто ASnews.kz сайтына берген сұхбатында «Қайраттың» қарсыласы – «Брюггенің» қазіргі жағдайына баға берді.

«Шарлеруадан» (0:2) кейін тағы бір сәтсіздік болады деп ешкім күткен жоқ. «Брюггеге» не болғанын нақты айтып беру қиын. «Ла-Лувьерге» қарсы матчта (2:3) Ордоньес қызыл қағаз алды – бұл шешімді әділетті болды деуге келмейді, бірақ содан кейін команда шашырап кетті. Бас бапкер мұны клубта өткізген уақытының ішіндегі ең нашар тайм деп атады.

2:1 есебінен кейін ойында бақылау да, қысым да, тіпті салқынқандылық та болмады. Ал «Ла-Лувьер» есепті теңестірген соң жағдай тіпті қиындай түсті. Футболшылардың әрекеттерін көру біртүрлі болды – бұл еш қиналмай үш ұпай алатын кездесу еді, алайда ешкім күтпеген сенсациялық жеңіліс орын алды. Маусым басталар алдында «Брюгге» чемпионаттың аутсайдеріне екі матчта да жол береді деп тек есі ауысқан адам ғана болжай алатын еді», – деді Берто.

«Брюгге» әуелі Кубоктан шығып қалды, кейін турнир кестесінің соңында тұрған командадан жеңілді. Айта кетерлігі, Бельгияның ең атақты клубтарының бірі бас бапкерін небәрі бір жарым ай бұрын ғана ауыстырған болатын.

«Қайрат» бельгиялық ұжымды 20 қаңтар күні «Астана Аренада» қабылдайды. Бұл – алматылықтар үшін Чемпиондар лигасының осы маусымында өз алаңында өткізетін соңғы ойыны.

Бұған дейін HLN порталының сарапшысы Томас Таке «Қайрат» пен «Брюгге» арасындағы матч жайлы пікірімен бөліскен еді.