Бельгиялық эксперт – «Қайраттың» ойыны жайлы: «Брюггенің» қателесуге құқығы жоқ

Бельгиялық HLN порталының сарапшысы Томас Таке ASnews.kz сайтына берген сұхбатында «Қайрат» пен «Брюгге» арасындағы матчтан не күтетінін айтты.

Оның сөзінше, Бельгия Кубогынан шығып қалғаннан кейін Чемпиондар лигасындағы ойындар «Брюгге» үшін бұрынғыдан да маңызды бола түскен.

«Егер қалған матчтарда олар «Қайрат» пен «Марсельді» жеңсе, плей-оффқа өту ықтималдығы жоғары. Ал бір ойында ұтылса, бұл үлкен сәтсіздік болады. Мұндай жағдай чемпиондық жарыста да қысымды күшейтеді.

«Брюггенің» Бельгиядағы мәртебесі Германиядағы «Бавария» немесе Нидерландтағы «Аякс» секілді. Олар кемінде екі жылда бір рет чемпион атануға міндетті. Сондықтан жергілікті жанкүйерлер Астанадағы қателікті кешірмейді. Ал ұзақ әрі шаршататын сапарды ескерсек, матч оңай болмайын деп тұр. Менің білуімше, клуб басшылығы футболшыларға қажетті жағдайдың барлығын жасап жатыр», – деді Таке.

Сондай-ақ сарапшы «Брюггенің» жаңа бас бапкері Иван Леко жайлы пікір білдірді:

«Чемпионатта Леко командамен қатарынан үш матчта жеңіске жетіп, Ники Хайеннің қызметтен кетуіне наразы болғандарды тыныштандырды. Қазір бәрі орнына келгендей. Оның үстіне, Леко 2017-2019 жылдары да «Брюггені» жаттықтырған. Дегенмен, соңғы «Шарлеруаға» қарсы жеңіліс көп сұрақ тудырады», – деп қосты ол.

Бельгия Кубогының ширек финалында «Брюгге» сырт алаңда күтпеген жерден «Шарлеруаға» 0:2 есебімен есе жіберді. Қазір бұл команда турнир кестесіндегі қауіпті аймақтан небәрі төрт ұпай ғана алда тұр.

20 қаңтарда «Қайратқа» қарсы ойын алдында Леконың командасы тағы бір матч өткізеді. Қарсыласы – турнир аутсайдері саналатын «Ла-Лувьер». Соған қарамастан, «Ла-Лувьердің» ойыншылар құны 15,2 миллион еуроға бағаланады, бұл «Қайратқа» қарағанда (14,1 млн еуро) сәл қымбат.

Бұған дейін «Қызылжарда» ойнаған бельгиялық қорғаушы Брайан Ван Ден Богарт та «Қайраттың» «Брюггеге» қарсы матчтағы мүмкіндіктерін бағалаған болатын.