Эксперт – «Қайраттың» ойыны алдында: «Брюгге» негізгі ойыншыларынан айырылып қалуы мүмкін

Бельгиялық журналист және VTM Nieuws жүргізушісі Ярно Берто ASnews.kz сайтына берген сұхбатында «Брюггенің» екі маңызды футболшысы «Қайратқа» қарсы матчты жіберіп алуы мүмкін екенін айтты.

«Жергілікті жанкүйерлер Астанада тартысты ойын күтуде. Кубоктан шығып қалып, чемпионатта аутсайдерден жеңілген соң, «Брюггенің» «Қайратқа» есе жіберуге қақысы жоқ – әйтпесе олар еурокубоктармен қоштасады. Көңіл-күй – бір басқа, бірақ кеше команда бірнеше негізгі ойыншысынан айырылып қалған сыңайлы.

Цолис пен Верманттың 20 қаңтарда алаңға шығуға жағдайы келе ме, жоқ па – әзірге белгісіз. Жарақаттың ауырлық деңгейін әлі тексеру қажет», – деді Берто.

Еске салайық, Бельгия кубогында «Шарлеруадан» (0:2) сүрінген соң, «Брюгге» чемпионатта қарапайым «Ла-Лувьерден» (2:3) сенсациялық түрде жеңіліп қалды.

Биылғы маусымда 23 жастағы Христос Цолис 32 матч өткізіп, 11 гол соқты және 16 нәтижелі пас берді. Ал 21 жастағы Ромео Верманттың еншісінде 27 ойында тоғыз доп бар.

Чемпиондар лигасының негізгі кезеңінің жетінші турында «Қайрат» елордада «Брюггені» қабылдайды. Бұл – қонақтардың 134 жылдық тарихындағы ең алыс сапары.

Бұған дейін «Қызылжар» клубының бельгиялық бұрынғы қорғаушысы Брайан Ван Ден Богарт «Қайраттың» «Брюггеге» қарсы матчтағы мүмкіндігін бағалады.