«Қайраттың» экс-ойыншысы Исаэль: «Астана» және «Интерге» қарсы матчта мүмкіндік бар

«Қайраттың» бұрынғы жартылай қорғаушысы Исаэль Барбоза ASnews.kz тілшісіне берген сұхбатында алматылық клубтың «Астана» мен «Интерге» қарсы ойындардағы мүмкіндігіне баға берді.

«Астана» тарапынан болатын бәсекелестікке қарамастан, мен үшін «Қайрат» фаворит. Олардың чемпион атанатын тамаша мүмкіндігі бар. Чемпиондық матчтан кейін «Қайрат» «Интерге» қонаққа барады. Чемпиондар лигасында басқа деңгейдегі қарсыластар ойнайды, бірақ соңғы уақытта футболда тосынсыйлардың көп болатыны сонша, мен оң нәтижеге сенемін», – деді бразилиялық футболшы.

Рафаэль Уразбахтин шәкірттері Премьер-лиганың соңғы турында «Астанамен» чемпиондық үшін таласады.

Одан кейін қарашаның 5-нен 6-на қараған түні «Қайрат» сырт алаңда «Интермен» ойнайды. Италиялық клуб А сериясында және Чемпиондар лигасында төртінші орында келе жатыр.

Исаэль алматылық клубқа 2014 жылы келген. Төрт маусымда 174 матч өткізіп, 41 гол мен 58 нәтижелі пастың авторы атанды. Төрт рет Қазақстан кубогын, екі рет Қазақстан суперкубогын жеңіп алды.

Бұған дейін «Слован Братислава» командасының қорғаушысы Юрий Медведев Қазақстан футболындағы прогресс пен «Қайраттың» Чемпиондар лигасындағы жетістігі туралы пікір білдірген еді.