«Вулверхэмптонмен» болатын матчқа қатысады: «Бернли» бапкері «Челсидің» қандай талап қойғанын айтты

«Бернлидің» бас бапкері Ники Хайен «Челси» Дастан Сәтпаевтың «Чарльтонмен» болатын матчқа қатысуына рұқсат бермегенін мәлімдеді, деп хабарлайды ASnews.kz BurnleyExpress баслымына сілтеме жасап.

Жарақатынан айыққан қазақстандық шабуылшы өткен демалыс күндері «Уотфордқа» қарсы ойында алаңға қайта оралды. Ол кездесудің соңғы 20 минутында шығып, командасының 4:0 есебімен жеңіске жетуіне үлес қосты.

Осылайша, Дастан қыркүйек айының басында «Мидлсбромен» өткен (1:1) ойыннан кейін алаңға алғаш рет шықты.

Хайен «Чарльтонға» қарсы кездесуде де қазақстандық футболшыға үміт артқысы келген. Өйткені команда бір жылға жуық уақыттан бері өз алаңында жеңіске жете алмай жүр.

Алайда 18 жастағы шабуылшы матчқа қатысатын ойыншылар тізіміне де, қосалқы құрам да енбеді. Бұған оның негізгі клубы «Челсидің» шешімі себеп болған.

«Жоқ, «Челси» Дастанның бұл матчқа қатысуына рұқсат бермеді. Ол ауыр жарақат алғандықтан, «Челси» ойыншының алаңға оралуына қатысты шешімді медициналық мамандарымен бірлесе отырып қабылдап келеді. Олар біздің медициналық штабпен де жұмыс істеді. Бірақ бүгінгі ойынға қатыса алмайтынын ескертті.

Дастан ұзақ уақыт бойы ойнамады. Қазір де «Челсидің» қарауында жүр. Бұл – екі клубтың медициналық мамандары арасындағы бірлескен жұмыстың нәтижесі. Олар Дастанды бұл матчқа қатыспауы керек деп шешті.

Ол жұма күні «Вулверхэмптонға» қарсы ойнайды. Ал бүгінгі кездесуге қатыспау туралы шешімді «Челси» қабылдады», – деді бапкер.

Сондай-ақ Хайен Сәтпаевтың қашан ойнап, қашан алаңға шықпайтынын «Челсидің» шешіп отырғаны қаншалықты қолайсыз екені туралы сұраққа былай жауап берді:

«Иә, бұл жағынан қиындық бар. Бірақ бұл жалға беру туралы келісімнің бір бөлігі саналады. Ойыншы жарақат алса, өз клубының медициналық штабына жүгінеді және олар біздің мамандармен бірге жұмыс істейді. Сондықтан біз мұндай тәртіптің бар екенін алдын ала білдік.

Әрине, бұл көңіл көншітпейді. Өйткені Дастанның «Уотфордқа» қарсы матчта қосалқы құрамнан шығып, ойынға араласқанын көргенде, шабуыл шебінде тағы бір қауіпті ойыншы пайда болғанын түсіндік. Дастан команданың шабуылдағы мүмкіндіктерін арттырып, жылдамдық пен техникалық шеберлік қосады.

Қазір ол ойнай алмайды. Әр апта сайын түрлі жағдайлар туындап жатыр. Дегенмен біз жұмысымызды жалғастырамыз. Алдымызда жаңа матч күтіп тұр».

Дастан Сәтпаев Чемпионшиптің 10-турында «Чарльтонмен» болған ойынға қатыспады. Бұл матчта «Бернли» соңғы минуттарда қақпасына гол өткізіп (2:2), жеңісті уысынан шығарып алды.