«Бәсекелестік тым жоғары болды»: қазақстандық қорғаушы «Галатасарайда» неге қала алмағанын айтты

Қазақстан әйелдер ұлттық құрамасы мен молдовалық «Зимбрудің» қорғаушысы Камила Совет ASnews.kz сайтына берген сұхбатында ыстанбұлдық «Галатасарайына» неліктен ауыса алмағаны туралы айтып берді.

«Өзімді шетелде сынап көргім келді, сондықтан Түркиядан бастауды ұйғардық. Географиялық жағынан да жақын, әрі алғашқы легионерлік тәжірибе үшін таптырмас нұсқа. Алтай Даумов арқылы «Галатасарайға» бару мүмкіндігі туып, мені Ыстамбұлға қаралымға шақырды.

Өкінішке қарай, уақыты сәл қолайсыздау болды. Мен Түркияға ұшып бара жатқан кезде ол жақта жан түршігерлік жер сілкінісі басталып, салдарынан қаралым шамамен бір аптаға шегерілді. Осы уақыт аралығында мен жеке жаттықтым, тіпті ауырып, қайта жазылып та үлгердім, сондықтан бұл процеске бабымда келе алмадым. Ол кезде жасым небәрі 18-де еді, ал командада легионерге арналған бір-ақ бос орын қалған болатын, сондықтан бәсекелестік тым жоғары болды. Шынымды айтсам, мұндай деңгейдегі команда үшін мен әлі «шикілеу» едім», – деді Совет.

Дегенмен, қазақстандық футболшы ыстамбұлдық клубтың инфрақұрылымын жоғары бағалап, бұл сапар оның мансабына маңызды серпін бергенін атап өтті:

«Галатасарайдың» өзі маған үлкен әсер қалдырды: дайындық деңгейі өте жоғары, легионерлер көп, тамаша жаттығу базасы бар және барлық процесс кәсіби түрде ұйымдастырылған. Бұл мен үшін құнды тәжірибе болды – мен нені мақсат ету керектігін түсіндім», – деп түйіндеді қорғаушы.

Айта кетейік, Совет Қазақстанда «Томирис-Тұран», «БИІК», «Ордабасы» және «Ұлытау» сынды бірқатар командалардың намысын қорғады. 2026 жылдың басында қазақстандық ойыншы албаниялық «Киностудио» клубына ауысып, мансабындағы еуропалық кезеңді бастады. Ал биылғы жылдың маусым айынан бері ол молдовалық «Зимбру» сапында өнер көрсетіп жүр.

«Жер сілкінісі «Галатасарайға» ауысуыма кедергі болды». Қазақстандық футболшы Еуропадағы мансабын қалай құрып жатыр?