Сарапшылар Дастан Сәтпаев «Бернлидің» «Мидлсброға» қарсы матчында негізгі құрамда алаңға шығады деп болжауда

18 жастағы қазақстандық шабуылшы Дастан Сәтпаев Чемпионшиптің кезекті турында «Мидлсброға» қарсы кездесуде «Бернлидің» негізгі құрамында алаңға шығады деп күтілуде. Бұл матчта Ники Хайеннің шәкірттері 200 күнге созылған жеңіссіз серияны тоқтатуға тырысады, деп хабарлайды ASnews.kz Burnley Express басылымына сілтеме жасап.

Британдық басылым құрамдағы үлкен кадрлық дағдарыс аясында қазақстандық форвардты бастапқы құрамның жобасына қосып отыр. Жарақаттар мен шеттетулер салдарынан команда Башир Хамфрис, Лукас Пирес және Джош Лораннан айырылды. Ал трансферлік дедлайн күні сапқа қосылған жаңа ойыншылар – Рэо Хататэ, Игор Жулио және Ларджи Рамазанидің осы кездесуде алаңға шығуы тіркеу мерзіміне байланысты белгісіз.

«Бернли» бұл ойынға дағдарыс сәтінде келе жатыр: ұжым ресми кездесулердің негізгі уақытында 200 күннен астам уақыт бойы жеңіске жете алмай келеді. «Норвичтен» ұтылғаннан кейін (1:4) команда турнирлік кестеде жарыстың төменгі аймағына түсіп қалды. Өз кезегінде «Мидлсбро» жарыс кестесінде бесінші орында келеді.

«Бізге жауапты реакция және өз алаңымыздағы жеңіс қажет. «Вест Хэмге» қарсы ойында жанкүйерлермен бірге бір ұжым болғанда не істей алатынымызды дәлелдедік. Алдағы өз алаңымыздағы кездесу – жағдайды түзеудің тамаша мүмкіндігі», – деді «Бернлидің» бас бапкері Ники Хайен.

18 жастағы қазақстандық форвард Дастан Сәтпаев «Бернли» сапында лондондық «Челсиден» жалға алу құқығымен өнер көрсетеді. Чемпионшиптің үшінші турында «Норвичке» қарсы өткен кездесуде (1:4) Сәтпаев алғаш рет негізгі құрамда шығып, толық 90 минут бойы өнер көрсетті. Төрт сәтті алдап өту жасап, үш шешуші пас берген ол Flashscore сараптамалық порталының нұсқасы бойынша 7.5 бағасын алып, өз командасындағы ең үздік ойыншы атанды. «Бернли» мен «Мидлсбро» арасындағы кездесу «Терф Мур» стадионында өтеді.

ЧЛ-да қарсылас болды, ал енді командаластар: Сәтпаев «Бернлиде» «Селтиктің» экс-жартылай қорғаушысымен бірге ойнайды