Дастан Сәтпаев «Норвичке» қарсы ойында «Бернли» сапындағы ең үздік футболшы атанды

«Бернлидің» қазақстандық шабуылшы Дастан Сәтпаев Чемпионшиптің үшінші туры аясындағы «Норвич Ситиге» қарсы сырт алаңдағы кездесуде (1:4) толық 95 минут өнер көрсетті, деп хабарлайды ASnews.kz.

18 жастағы форвард тұрақты чемпионат аясында алғаш рет команданың бастапқы құрамына еніп, әсерлі жеке статистика көрсетті. Ойын барысында Сәтпаев қақпаға 3 соққы бағыттады, 28 пастың 21-ін дәл берді (75%), допқа 42 рет тиісті (оның 6-ауы қарсыластың айып алаңында) және 7 дриблинг әрекетінің 3-еуін табысты аяқтады. Көрсеткен ойыны үшін қазақстандық футболшы сарапшылардан 7.6 балл алды – бұл кездесуге қатысқан барлық футболшылар арасындағы үшінші және «Бернли» сапындағы ең жоғары көрсеткіш.

«Карроу Роуд» стадионындағы бәсеке «Бернли» үшін сәтсіз басталды: қонақтар 21-минутқа дейін-ақ үш жылдам гол жіберіп алды (2', 5', 21'). 27-минутта команда бір доппен жауап қайтарғанымен, 67-минутта «Норвич» матчтың түпкілікті есебін орнатты – 4:1.

«Норвич Ситиге» қарсы кездесу 18 жастағы форвард үшін ағылшындық клуб сапында бастан-аяқ ойнаған алғашқы ойын болды.

Сәтпаевтың Чемпионшиптегі дебюті екінші турда «Вест Бромвичке» қарсы өтті (1:3, 57-минутта қосалқы құрамнан шықты). Ал барлық турнирлер бойынша бастапқы құрамдағы алғашқы матчын қазақстандық футболшы 26 тамызда Лига Кубогының екінші раундында «Брэдфорд Ситиге» қарсы өткізген еді (0:0, пенальти бойынша – 2:4).