ҚПЛ-дың үздік сұрмергені Бьорн Йонсен Қазақстанға тез бейімделуінің сырымен бөлісті

Шымкенттік «Ордабасының» шабуылшысы Бьорн Йонсен ASnews.kz сайтына берген сұхбатында ұзақ бейімделу кезеңінен қалай айналып өтіп, бірден Қазақстан премьер-лигасының үздік мергендер тізімін бастағанын айтып берді.

«Шынымды айтсам, басында бейімделу сәл қиынға соқты – басқа мәдениет, жаңа қала, жаңа адамдар, таныс емес орта. Бірақ маған бәрінен де команда көп көмектесті деп ойлаймын. Жігіттердің барлығы дерлік ағылшын тілінде сөйлейді және олар менің өзімді жайлы сезінуім үшін қолдан келгеннің бәрін жасады. Кейбіреулері отбасыма, пәтер табуға көмектесті. Мені түрлі жағдайда қолдаған көптеген ойыншыларды атап өте аламын. Сондықтан мына нәрсені баса айтқым келеді: маған тез бейімделіп, ұжымның бір бөлігіне айналуға және өзімді отбасымдағыдай сезінуге дәл осы «Ордабасы» футболшылары көмектесті. Менің нәтижелілігім – солардың еңбегі», – деді Йонсен.

Еске салайық, норвегиялық шабуылшы Қазақстанға маусым айында келген болатын. Қазіргі уақытта 34 жастағы футболшы ҚПЛ-дың сұрмергендер бәсекесінде көш бастап тұр. Оның еншісінде чемпионаттың 16 матчында соғылған 14 гол мен үш нәтижелі пас бар. Шымкенттіктер кезекті матчын бүгін, 24 қазанда өз алаңында елордалық «Жеңіске» қарсы өткізеді.

Йонсен «Ордабасының» мүмкін алтын дублі туралы: 35-ші туған күніме ең жақсы сыйлық