Максим Самородов: өмірбаяны, толық ақпарат, жалақысы, жеке өмірі, жары. Мәскеулік «Спартакқа» ауысуы

Максим Самородов қазақстандық футбол тарихындағы ең қымбат трансферге жақын тұр. Мәскеулік «Спартак» «Ахмат» шабуылшысы үшін ұсынысты бонустармен қоса 8 миллион еуроға дейін өсірді, ал ойыншы жеке келісімшарт шарттарын келісіп қойды.

ASnews.kz Қазақстан құрамасының 24 жастағы форварды туралы білу керек маңызды деректерді жинақтады.

Максим Самородов деген кім?

Максим Иванович Самородов – шабуылшы және оң жақ вингер, сонымен қатар сол жақ қанатта да, шабуыл шебінің ортасында да ойнай алады. 2002 жылдың 29 маусымында Ақтөбеде дүниеге келген. Бойы – 180 см.

Ақтөбе футболының түлегі, туған клубының бүкіл жүйесінен өткен. Transfermarkt порталының мәліметінше, оның нарықтық құны 3 миллион еуроны құрайды – соңғы жаңарту сәтінде бұл көрсеткіш оны Дастан Сәтпаевпен бірдей Қазақстанның ең қымбат футболшысы етіп, РПЛ-дың ең қымбат 10 ойыншысының қатарына енгізді.

Балалық шағы: Алғашқы сөзі – «доп»

Самородовтың футболға келу тарихы – атасының арқасы. Ол кезінде Жайсаңның «Қайратында» ойнаған, ал үйленгеннен кейін Ақтөбеге көшіп, әуесқой командада өнер көрсеткен.

«Мен оны футболға бес жасында алып келдім. Ол бұл спорт түріне қатты қызығушылық танытты. Үш жасында аулада ойнасын деп доп сыйладым. Тіпті оның алғашқы айтқан сөзі де «доп» болды. Максим таңертеңнен кешке дейін аулада ойнайтын – оны үйге бірден кіргізу мүмкін емес еді», – деп еске алды футболшының атасы BorodAbata жобасына берген сұхбатында.

Максимнің өзі де балалық шағын әзілмен еске алатын:

«Кейде мені жазалап, үйден шығуға тыйым салатын. Ондайда әжеме «нанға барып келейінші» деп сұранатынмын. Кроссовкамды сөмкеме ұқыпты салып, нанға шығамын да, бес сағатқа жоғалып кететінмін».

Оны қалай тапты?

2018 жылы функционер Данияр Шадыев Әлібек Бөлешевпен бірге бірінші және екінші лига ойыншыларын бақылап жүрген. Көмек трибунадан келді.

«Сонда мен Максимді көрдім. Бірақ маған қасымызда отырған оның атасы түрткі болды. Ол немересін көрсетті, біз де оған назар аудардық», – деп айтты Шадыев.

Одан кейін Александр Седневтің қаралымы болды. Бапкердің үкімі: «Бұл – дара «тауар», бұнымен жұмыс істеу керек».

16 жасында Самородовты негізгі командаға шақырды, ал 17 жасында ол премьер-лигада дебют жасады.

«Ақтөбе»: Дебюттен ҚПЛ жұлдызына дейінгі жол

2019 жылдың 5 қазанында Самородов Қазақстан премьер-лигасында «Қайратқа» қарсы матчта дебют жасады. Ол бұл күнді егжей-тегжейлі есінде сақтаған.

«Өзім ұяң баламын, командада тек Әлішер Әжімовті танитын едім. Оған қарсы алып кетші деп жаздым. Командада маған алғаш назар аударған Маркос Пиззелли болды. Ол: «Сәлем, балақай! Атың кім?» деп сұрады. Маркос әрдайым қасымда болып, қолдау білдірді», – деп еске алды форвард.

Ол матчта ол Исламхан, Эсеола, Эппель және Вржещинскиге қарсы ойнады. Гол соғатын сәт болған, бірақ пайдалана алмады: «Қорыққан шығармын. Алдымда Стас Покатиловты көріп, қисық пас бере салдым».

2021 жылдың 2 шілдесінде «Ақжайыққа» қарсы матчта ол алғашқы голын соғып, бірден дубль жасап, 2:1 есебімен жеңіс сыйлады.

Балалық шағындағы жалғыз кумирі ретінде Марат Хайруллинді атады. Қолтаңба немесе фото үшін ешқашан жүгірген емес – тіпті Франция құрамасына қарсы матчтан кейін де ешкіммен жейде ауыстырмаған.

«Ахматқа» ауысу

Ресейден қызығушылық 2023 жылы-ақ болған: «Ахматтың» ол кездегі бапкері Андрей Талалаев ойыншыны қатты қалады, грозныйлықтар 300 мың еуро төлеуге дайын болды, бірақ клубтар келісе алмады.

Параллельді түрде оған «Рапид», «Легия», АЕК, «Слован Братислава», «Раков», «Славия Прага», «Виктория Пльзень», кейінірек – ПАОК пен «Арис» қызықты.

Шешуші рөлді Қазақстан құрамасының экс-бапкері, «Ахматты» басқарған Магомед Адиев ойнады. Ол Самородовты грекиялық нұсқадан айнытты.

«Мен оған Зайнутдиновтың жолымен жүруді ұсындым. Ол «Ростовқа» келді, өзін көрсетті және мәртебелірек клубқа ауысты. Осы нұсқаны негізге алуды ұсындым. Ол келісті», – деді Адиев BorodAbata-ға берген сұхбатында.

2024 жылдың тамызында «Ахмат» Самородовты «Ақтөбеден» 1 миллион еуроға сатып алды. РПЛ-дағы дебюті 11 тамызда – «Спартакқа» қарсы өтті.

Тағдырдың тәлкегі: қазір оны өз қатарына қосқысы келетін де дәл осы «Спартак».

«Ахматтағы» көрсеткіштері

2025/26 маусымында Самородов РПЛ-да 29 матч өткізіп, бес гол соқты және 10 нәтижелі пас берді. Барлық додада 34 матч өткізді.

Айлардың бірінің қорытындысы бойынша «Ахмат» жанкүйерлері оны команданың үздік ойыншысы деп таныды: бес матчта ол фанаттар дауыс беруінде 17 ұпай жинап, екі рет матчтың үздік ойыншысы атанды. Сондай-ақ РПЛ-дың 2024/25 маусымының қараша және желтоқсан айларындағы ең үздік голының авторы болды.

«Ахматпен» келісімшарт 2028 жылдың 30 маусымына дейін жарамды.

«Спартакқа» трансфер: Қазіргі жағдай

Мұнда нақты болу маңызды: мақала жарияланған сәтте трансфер ресми түрде рәсімделген жоқ.

Келіссөздер хронологиясы былай: 2026 жылдың маусымында «Спартак» алғашқы ұсынысты жасады – 4 миллион еуро. «Ахмат» бас тартып, ойыншыны 10 миллионға бағалады. Тамызға қарай мәскеуліктер ұсынысты бонустарды қосқанда 8 миллион еуроға дейін көтерді, ал журналист Анар Ибрагимовтың ақпараты бойынша, Самородов жеке келісімшарт шарттарын келісіп қойды.

Бөлек ескеретін жайт – легионерлерге арналған жаңа лимит. Самородов РПЛ-да легионер болып саналмайды, бұл оны кез келген ресейлік клуб үшін бағалы активке айналдырады.

Дереккөздердің айтуынша, Грозныйда Самородовтың кетуі бұрыннан болжанған: оның орнына Ғалымжан Кенжебекті, кейін вингер Максутиді сатып алды, сонымен қатар құрамда Лечи Садуллаев бар.

«Ахматтың» спорттық директоры Руслан Газзаев «Спартак» келіссөздерді жалғастырса, ауысу мүмкін екенін айтты.

Дегенмен, инсайдерлер арасында бірыңғай пікір жоқ: журналист Иван Карпов 4 миллион еуродан асатын сома туралы ақпаратты теріске шығаруда. Сонымен, соңғы нүкте әлі қойылған жоқ.

Жалақысы

Самородовтың келісімшарты бойынша ресми мәліметтерді «Ахмат» та, «Спартак» та жарияламады.

Бұл туралы нарық бағдары түсінік береді. РПЛ-дың орташа клубының негізгі құрам ойыншылары айына 1,5–3 миллион рубль (8-ден 16,5 миллион теңгеге дейін) табады. Самородовтың мәртебесін ескере отырып – жанкүйерлер нұсқасы бойынша команданың үздік ойыншысы, 3 миллион еуролық баға және шабуыл көшбасшысы – оның Грозныйдағы табысы осы дәліздің жоғарғы бөлігінде болғаны қисынды.

«Спартакқа» ауысу жалақының бірнеше есе өсуін білдіреді. РПЛ-дың топ-клубтары негізгі құрам ойыншыларына жылына 1,5-тен 3 миллион еуроға дейін (804,2 млн-нан 1,61 млрд теңгеге дейін) төлейді. Бұл – нарықтық бағалау, расталған цифрлар емес.

Салыстыру үшін: «Ақтөбеде» кеткенге дейін оның жалақысы, ҚПЛ логикасына сәйкес, айына бірнеше миллион теңгеден аспаған болар еді.

Жеке өмірі және жары

Самородов жеке өмірін көпшілікке жария ете бермейді, бірақ оның жұбайы Анастасия бірде сұхбат беріп, отбасының тұрмысы туралы айтып берген еді.

Оның айтуынша, олар әдеттегідей танысқан: Instagram-да бір-біріне бұрыннан жазылған, кейін көшеде кездейсоқ жолығып, араласа бастаған.

Ақтөбеде ол күйеуінің бірде-бір матчын жібермейтін. Грозныйда әлі стадионға бара қоймаған. Әр матч алдындағы ритуал біреу – қысқаша тілек: «Алға, ештеңеден қорықпа».

Отбасылық әзіл де бар, ол кейде шындыққа айналады. Максим гол соқпаса – үйге келмейтінін айтады. Бирде солай болды: голсыз аяқталған матчтан кейін ол базада қонып қалған.

Жұбайы футболдың отбасы ырғағын қалай өзгертетіні туралы да айтты: маусым кезінде өмір тыныш әрі негізінен үйде өтеді, серуендеу мен жоспарларсыз. Демалыс чемпионат аяқталғанда басталады – сонда ғана бірге болуға уақыт табылады.

Жұп шетелге саяхаттағанды ұнатады. Ол ең ұмытылмас оқиға ретінде тойларын атайды.

Ресейге кету шешімі туралы Самородов тек ата-анасымен және әйелімен кеңескенін, бірақ соңғы таңдауды өзі жасағанын айтты: «Егер мен бір жаққа барғым келсе, барамын. Мені ешкім айныта алмайды».

Грозныйдағы ең жақын адамы – Идрис Умаев, форвард оны бауырым деп атайды және күн сайын хабарласады. Дүкендер қайда, қайда дәмді тамақтануға болады, қайда серуендеуге болатынын дәл содан сұрап білген.

Қазақ тілі туралы ашық айтады – түсінеді, бірақ ойын білдіру қиын және қате айтып қоюдан ұялады.

Грозный туралы бөлек әңгіме: қала оны тазалығымен таңғалдырды. Самородов ақ киімді жақсы көрді, ал Ақтөбеде, оның айтуынша, үнемі соғатын жел мен шаңнан ақ киіммен серуендеу мүмкін емес.

Қазақстан құрамасы

Самородов – кейінгі жылдары ұлттық құраманың негізгі ойыншыларының бірі. Словения қақпасына гол соқты, ол жерде Ян Облакты ренжітуді армандаған еді.

«Матч алдында Ян Облакқа гол соққым келді, соған бапталып едім. Ал алаңда кімге қарсы ойнап жатқаның маңызды болмай қалады. Гол соқтың ба – соқтың. Ал қақпада Облак болғанын орнымды босатып ауысқаннан кейін ғана түсіндім», – деді ол.

2026 жылдың маусымында Армениямен жолдастық кездесуде (тең ойын) гол соқты.

Өз мақсатын ашық айтады: Еуропаның топ-5 лигасына түсу. Қазақстан футболының түлектері арасынан бұны әлі ешкім жасай алған жоқ.

Максим Самородов – Transfermarkt нұсқасы бойынша Қазақстан құрамасының ең қымбат футболшысы (3 млн еуро), «Ақтөбе» мектебінің түлегі, 2024 жылдың тамызынан бастап «Ахмат» ойыншысы.

«Спартакқа» ауысуы мақала жарияланған сәтте ресми түрде расталған жоқ – тараптар келіссөздерді жалғастыруда.